ئه‌مساڵ نابینا و خاوه‌ن پێداویستییه‌ تایبه‌ته‌كان له‌ كرێی خوێندن ده‌به‌خشرێن

حكوومه‌تی عێراق بڕیاری دا سه‌رجه‌م قوتابییانی نابینا و خاوه‌ن پێداویستییه‌ تایبه‌ته‌كان له‌  كرێی خوێندنی ئه‌مساڵی ئێواران ببه‌خشرێن.

نه‌عیم ئه‌لعه‌بوودی وه‌زیری خوێندنی باڵا و توێژینه‌وه‌ی زانستی عێراق ئه‌مڕۆ سێشه‌م نووسراوێكی ئاراسته‌ی سه‌رجه‌م زانكۆ و په‌یمانگه‌ حكوومییه‌كان - ئێواران كردووه‌ و تێیدا فه‌رمانی كردووه‌ كرێی خوێندنی ئه‌مساڵ 2023-2024 له‌ قوتابییانی نابینا و خاوه‌ن پێداویستییه‌ تایبه‌كان وه‌رنه‌گرن و ببه‌خشرێن.

نووسراوه‌كه‌ به‌شێوه‌ی گشتاندن ئاراسته‌ی هه‌ر 33 زانكۆ و په‌یمانگه‌ حكوومییه‌كانی عێراق بۆ خوێندنی ئێواران كراوه‌، جه‌ختیش له‌وه‌ كراوه‌ته‌وه‌ كه‌ بڕیاره‌كه‌ له‌ دوێنێ دووشه‌م 25/9/2023 خراوه‌ته‌ بواری جێبه‌جێكردنه‌وه‌.

وه‌زیراره‌تی خوێندنی باڵا و توێژینه‌وه‌ی زانستی عێراق داواشی له‌ قوتابییان كردووه‌ ئاگاداری مه‌رجه‌كانی پێشكه‌شكردن و پسپۆرییه‌كان و واده‌ی پێشكه‌شكردنه‌كان بن.