نرخی نەوت بەرزبووەوە

دوای بڕیاری قەدەغەکردنی هەناردەکردنی سووتەمەنی لەلایەن مۆسکۆوە، نرخی نەوت بەرزبوونەوەی بەخۆی بینی و نرخی نەوت لە 94 دۆلار نزیک دەبێتەوە.

ئەمڕۆ دووشەممە 25ـی 09ـی 2023 لەگەڵ کرانەوەی بازاڕەکانی جیهان، نرخی نەوت بەرزبووەوە، نرخی نەوتی خاوی برێنت 48 سەنت بە ڕێژەی 0.5% بەرزبووەوە و گەیشتە 93 دۆلار و 75 سەنت، هەروەها نرخی نەوتی خاوی ڕۆژئاوای تەکساسی ئەمریکا بە ڕێژەی 50 سەنت واتە بە ڕێژەی 0.6% بەرزبووەوە و هەر بەرمیلێک بە 90 دۆلار و 53 سەنت مامەڵەی پێوە دەکرێت.

هەفتەی ڕابردوو مۆسکۆ بەمەبەستی سەقامگیرکردنی بازاڕی ناوخۆ بەشێوەیەکی کاتی هەناردەکردنی سووتەمەنی بۆ زۆربەی وڵاتان قەدەغە کرد، ئەمەش ترسی دابەزینی دابینکردنی نەوتی دروست کرد.