سه‌رۆكی هه‌رێمی كوردستان و باڵیۆزی فڕه‌نسا له عێراق جه‌ختیان له چاره‌سه‌ری كێشه‌كانی نێوان هه‌ولێر و به‌غدا له‌سه‌ر بنه‌مای ده‌ستوور و پاراستنی مافه‌كان كرده‌وه.
ئێواره‌ى ئه‌مڕۆ يه‌كشه‌م نێچيرڤان بارزانى سه‌رۆكى هه‌رێمى كوردستان پێشوازى له ئێريك شۆڤاليێ باڵيۆزى فڕه‌نسا له عێراق كرد.
له كۆبوونه‌وه‌يه‌كدا هه‌ردوولا دوايين پێشهاته‌كانى گفتوگۆى هه‌ولێر ـ به‌غدايان بۆ چاره‌سه‌ركردنى كێشه‌كانى نێوانيان و پرسى بودجه‌ى عێراق خسته به‌رباس و جه‌ختيان له به‌رده‌واميى گفتوگۆيه‌كى بنياتنه‌رانه بۆ چاره‌سه‌ركردنى كێشه‌كان له‌سه‌ر بنه‌ماى ده‌ستوور و پاراستنى مافه‌كانى هه‌مووان كرده‌وه.
تاوتوێكردنى بره‌ودان به په‌يوه‌ندييه‌كانى فڕه‌نسا له‌گه‌ڵ عێراق و هه‌رێمى كوردستان و فراوانكردنى هاريكاريى هاوبه‌شى نێوانيان له هه‌موو بواره‌كاندا، ته‌وه‌رێكى ديكه‌ى كۆبوونه‌وه‌كه بوو. تيايدا ئاماژه‌يان به ڕۆڵى فڕه‌نسا له عێراق كرد و داكۆكييان له خواستى دوولايه‌نه بۆ قووڵكردنه‌وه‌ى په‌يوه‌ندييه‌كان كرده‌وه.
دۆخى ناوخۆى هه‌رێمى كوردستان و ناوچه‌كه به گشتى و چه‌ند بابه‌تێكى ديكه‌ى جێى بايه‌خى هاوبه‌ش، لايه‌نێكى ديكه‌ى كۆبوونه‌وه‌كه بوو.
کۆمێنت (0)
تا ئێستا هیچ کۆمێنتێک نەکراوە.