شارەزایەکی کەشناسی پێشبینی دروستبوونی لافاو لە مانگەکانی داهاتوودا دەکات

شارەزایەکی کەشناسی دەڵێت لە ڕۆژانی کۆتایی مانگی 10 و مانگەکانی 11 و 12 ئەگەر دروستبوونی چەند حاڵەتێکی بەهێزی لافاو لە هەرێمی کوردستان و عێراق و ناوچەکەدا هەیە.

ئەمڕۆ شەممە 16ـی 09ـی 2023 سیروان ساڵح شارەزای بواری کەشناسی ڕایگەیاند: لە چەند ڕۆژێکی کۆتایی مانگی 10 و بە تایبەت مانگەکانی ( 11 و 12) ئەگەری چەند حاڵەتێکی لافاو هەیە ( کە هەندێکیان ئەگەر هەیە بەهێزبن) لە هەرێمی کوردستان و عێراق و وڵاتانی دەوروبەری و نیمچەدورگەی عەرەب.

ڕاشیگەیاند: ئەگەرێکی زۆریش هەیە لە مانگەکانی وەرزی بەهاری 2024 چەند جارێک لافاو ئەو ناوچانه بگرێتەوە کە پێشتر باسکراون.

ئەو شارەزایەی کەشناسی هۆشداریش دەدات و دەڵێت پێویستە هەر لە ئێستاوه ئامادەکاری جیددی و باش بکرێت بە تایبەت ئەو ناوچانەی کە پێشتر ڕێڕەوی چەم و ڕووبارەکان یان دۆڵەکان بوون و ئێستا کراون بە ناوچەی نیشتەجێبوون بۆ ڕێگرتن لە هەر حاڵەتێکی نەخوازراو.