سەرۆکی هەرێمی کوردستان و سەرۆک وەزیرانی عێراق پەیوەندییەکی تەلەفۆنییان ئەنجام دا و دۆخی ئەمنیی کەرکووکیان تاوتوێ کرد.
ئەمشەو شه‌ممه 02ـی 09ـی 2023 نێچيرڤان بارزانى، سه‌رۆكى هه‌رێمى كوردستان و محه‌مه‌د شياع سوودانى، سه‌رۆک وه‌زيرانى عێراقى فيدراڵ، له په‌يوه‌ندييه‌كى ته‌له‌فۆنيدا دوايين پێشهاته‌كانى دۆخى ئه‌منيى كه‌ركووكيان تاوتوێ كرد.
هه‌ردوولا جه‌ختيان له پێويستيى گرتنه‌به‌رى ڕێكارى خێراى لايه‌نه په‌يوه‌نديداره‌كان كرده‌وه بۆ پاراستنى ئارامى و سه‌قامگيريى كه‌ركووک و ڕێگه‌گرتن لەهه‌ر هه‌وڵێكى تێكدانى پێكه‌وه‌ژيان و ئاسايشى شاره‌كه و هاووڵاتييانى.
هه‌ردوولا داكۆييان كرده‌وه كه ده‌بێ لايه‌نه ئه‌منييه‌كانى شاره‌كه، بێ جياوازى ئارامى و سه‌قامگيريى هه‌موو پێكهاته‌كانى كه‌ركووک بپارێزن و ڕێگه له پشێوى و ئاڵۆزكردنى زياترى دۆخى ئه‌منيى شاره‌كه بگيرێت، هه‌روه‌ها به‌دواداچوون و لێپێچينه‌وه‌ى ياسايى به‌رامبه‌ر ته‌قه‌كه‌ران بكرێت كه له شه‌هيد و بريندارى لێكه‌وته‌وه.
کۆمێنت (0)
تا ئێستا هیچ کۆمێنتێک نەکراوە.