سەرۆکی حکوومەتی هەرێمی کوردستان پەیامێکی بڵاو کردۆتەوە و سەرکۆنەی شەهیدکردن و بریندارکردنی هاونیشتمانیانی کورد لە کەرکووک دەکات.
ئەمڕۆ شەممە 02ـی 09ـی 2023 کوردانی کەرکووک لەدژی ئاژاوەگێڕییەکانی چەکدارانی حەشدی شەعبی لە کەرکووک خۆپێشاندانیان ئەنجام دا و گەنجێکی کورد شەهید بوو و چەندین کەسی دیکە برینداربوون، مەسرور بارزانی سەرۆکی حکوومەتی هەرێمی کوردستان ڕایگەیاند: بەتووندی سەرکۆنەی ئاژاوەکانی دژ بە دیموکراسی و پێکەوەژیانی ئاشتیانە لە کەرکووک دەکەین. سەرکۆنەی شەهیدکردن و بریندارکردنی هاونیشتمانیانی کورد دەکەین کە لە لایەن شۆڤینیەکانەوە هێرشیان کراوەتەسەر.
مەسرور بارزانی لە پەیامەکە داوا لە سەرۆک وەزیرانی فیدراڵ دەکات کە بەپەلە کۆنترۆڵی ئەم بارودۆخە نەخوازراوە بکات و سەروماڵی هاونیشتمانیان و خۆپێشاندەران بپارێزن و چیتر ڕێگە بە کەسانی نابەرپرس نەدات بارودۆخەکە ئاڵۆزتر بکەن.
سەرۆکی حکوومەت ئاماژەی بەوەش داوە کە "لە هەمانکاتدا داوا لە هاووڵاتییە کوردە ستەملێکراوەکانیشمان لە کەرکووک دەکەم، دان بە خۆیاندا بگرن و خۆیان لە کاردانەوەی توند بەدوور بگرن. هەروەها داوا لە هاونیشتمانیانی عەرەبی ڕەسەن و تورکمانەکانی خەڵکی کەرکووکیش دەکەم، ڕێگە بە خەڵکێکی نامۆ بە شارەکە نەدەن ئاشتی و پێکەوەژیانی نێوان پێکهاتەکان تێک بدەن."
کۆمێنت (0)
تا ئێستا هیچ کۆمێنتێک نەکراوە.