گوژمەی پرۆژەكە زیاتر لە 13 ملیار دینارە و كاركردنیش تێیدا بە باشی بەڕێوە دەچێت
كاركردن لە قۆناغی یەكەمی پرۆژەی دروستكردنی ئۆڤەرپاس و ئەندەرپاسی بناڤێ و یوتێرنی ماڵتا لە شاری دهۆك بەردەوامە و ئێستاش نزیكەی 19%ی كارەكانی تەواو كراون.
ئەو پرۆژەیە ڕۆژی 13ی حوزەیرانی 2023 لەسەر ڕاسپاردەی مەسرور بارزانی، سەرۆكی حكوومەتی هەرێمی كوردستان لەلایەن ساسان عەونی، وەزیری شارەوانی و گەشتوگوزار و بە ئامادەبوونی پارێزگاری دهۆك بەردی بناغەكەی دانرا.
لە ڕێوڕەسمی دانانی بەردی بناغەی پرۆژەكە لە وتارێكدا ساسان عەونی، ڕایگەیاند: ئەم پڕۆژەیە لەسەر ڕاسپاردەی ڕێزدار مەسرور بارزانی سەرۆکی حکوومەتی هەرێمی کوردستان جێبەجێ دەكرێت، بەمەبەستی نەهێشتنی جەنجاڵی لە شەقامی دووسایدی خێرای بارزان لەناو شاری دهۆک و دوا ترافیکلایتی سەر ئەو شەقامە هەڵدەگیرێت و هاتوچۆی هاووڵاتییانیش لە زاخۆوە بۆ هەولێر ئاسان دەکات و هیچ وەستانێکی تێدا نامێنێت.
شایەنی باسە، ئەو پرۆژەیە یەكێكە لە پرۆژە گەورە و ستراتیژییەكانی كابینەی نۆیەمی حكوومەتی هەرێمی كوردستان و بە گوژمەی 13ملیار و 145 ملیۆن دینار لەسەر بودجەی وەبەرهێنانی وەزارەتی شارەوانی و گەشتوگوزار جێبەجێ دەکرێت، زیاتر لە شەش هەزار مەتر خزمەتگوزاریی شەقام و كاری جۆراوجۆر لەو قۆناغە لەخۆدەگرێت و ئێستاش كاری كۆنكرێتكردن و تۆڕی ئاو و كارەبا و دانانی دیواری پاڵپشت و چەند كارێكی تری تێدا جێبەجێ دەكرێت.
کۆمێنت (0)
تا ئێستا هیچ کۆمێنتێک نەکراوە.