كودەتایەكی سەربازی لەم وڵاتە روویدا 

ئەمڕۆ چوارشەممە، سوپای گابۆن، هەڵوەشاندنەوەی ئەنجامی هەڵبژاردنەكان و دەستوور و دەستبەسەرداگرتنی دەسەڵاتی ڕاگەیاند، ئەمەش دوای ڕاگەیاندنی ئەوەی كە عەلی بۆنگۆی سەرۆك كۆمار ،خولی سێیەمی هەڵبژاردنەكانی سەرۆكایەتی وڵاتەكەی بردۆتەوە.
ئەفسەرانی باڵای سوپای گابۆن لە كەناڵی گابۆن 24 دەركەوتن و دەستبەسەرداگرتنی دەسەڵاتیان ڕاگەیاند.
ئەو ئەفسەرانە ئاماژەیان بەوەشكردووە، ئەوان نوێنەرایەتی هەموو هێزە ئەمنییەكان و بەرگرییەكانی گابۆن دەكەن و هەڵبژاردنە گشتییەكانی ئەم دواییە باوەڕپێكراو نەبوون و ئەنجامەكانیان نادروست بووە.
هەروەها داخستنی سنوورەكانی وڵات تا ئاگاداركردنەوەی زیاتر و هەڵوەشاندنەوەی دامودەزگاكانی دەوڵەتیان ڕاگەیاند.
شایانی باسە  عەلی بۆنگۆ-ی تەمەن 64 ساڵ، دوای كۆچی دوایی باوكی لەساڵی 2009، ماوەی 14 ساڵە سەرۆكی وڵاتەكەیە، عومەر بۆنگۆ ئۆندیمبای باوكیشی زیاتر لە 41 ساڵ حوكمڕانی وڵاتەكەی كرد.
دوا بەدوای راگەیاندنی كۆدەتاكە-ش جۆزێپ بۆرێل، بەرپرسی سیاسەتی دەرەوەی یەكێتیی ئەورووپا، ڕایگەیاند، وەزیرانی بەرگریی یەكێتییەكە بارودۆخی گابۆن تاوتوێ دەكەن و ئەگەر كودەتایەك لەوێ پشتڕاست بكرێتەوە، ئەمە دەبێتە هۆی نائارامی زیاتر لە ناوچەكەدا.
هەروەها  ئەلیزابێس بۆرن، سەرۆكوەزیرانی فەرەنسا ڕایگەیاند، وڵاتەكەی لە نزیكەوە بەدواداچوون بۆ دۆخی گابۆن دەكات.