سه‌باره‌ت به ڕێككه‌وتنی دوورخستنه‌وه و چه‌ككردنی حزبه‌كانی كوردستانی ئێران، حكوومه‌تی عێراق ئه‌مڕۆ دووشه‌م وه‌ڵامی ئێرانی دایه‌وه و ڕایگه‌یاند كه ئه‌وان سه‌رجه‌م خاڵه‌كانی ڕێككه‌وتنه‌كه‌یان جێبه‌جێ كردووه.
باسم عه‌وادی گوته‌بێژی حكوومه‌تی عێراق له تۆڕی كۆمه‌ڵایه‌تی (X) ڕایگه‌یاند: گرینگترین بنه‌ماكانی سیاسه‌تی ده‌ره‌وه ئه‌وه‌یه كه عێراق نه‌بێته لایه‌نێك له زیان گه‌یاندن به هاوسێیه‌كانی، هه‌روه‌ها سه‌روه‌ری خاكی عێراقیش پێویستی به لێكتێگه‌یشتن ئه‌منی هه‌یه بۆ پاراستنی سنووره‌كان له هه‌ر ده‌ستدرێژییه‌كدا.
ڕاشیگه‌یاند: له‌سه‌ر ئه‌م بنه‌مایه عێراق ڕێككه‌وتنێكی له‌گه‌ڵ ئێران ئیمزا كردووه سه‌باره‌ت به "ڕێگریكردن له دزه‌كردنی چه‌كداران، ڕاده‌ستكردنه‌وه‌ی داواكاران، چه‌كداماڵین و لابردنی كه‌مپه‌كان"، بۆ ئه‌م مه‌به‌سته‌ش ئه‌وه‌ی له‌سه‌ر عێراق بووه سه‌رجه‌م خاڵه‌كانی جێبه‌جێی كردووه.
ئه‌مه له‌كاتێكدایه كه ناسڕ كه‌نعانی گوته‌بێژی وه‌زاره‌تی ده‌ره‌وه‌ی ئێران ئه‌مڕۆ دووشه‌م له كۆنگره‌یه‌كی رۆژنامه‌وانیدا ڕایگه‌یاندبوو: ڕێككه‌وتنمان له‌گه‌ڵ حكوومه‌تی عێراق كردووه كه ده‌بێت حزبه‌كانی كوردستانی ئێران چه‌ك بكرێن و باره‌گاكانیشیان له‌سه‌ر سنوور چۆڵ بكه‌ن و بچنه ئه‌و كه‌مپانه‌ی كه حكوومه‌تی عێراق بۆیان دیاری ده‌كه‌ن.
گوته‌بێژی وه‌زاره‌تی ده‌ره‌وه‌ی ئێران جه‌ختیشی كرده‌وه كه دوا واده‌ی جێبه‌جێكردنی ڕێككه‌وتنه‌كه رۆژی 19/9/2023 یه و به‌هیچ شێوه‌یه‌كیش ئه‌و واده‌یه درێژ ناكرێته‌وه.
ئاماژه‌ی به‌وه‌شدابوو كه جێبه‌جێكردنی سه‌رجه‌م خاڵه‌كان و درێژنه‌كردنه‌وه‌ی واده‌ی جێبه‌جێكردنی ڕێككه‌وتنه‌كه‌یان به لایه‌نی عێراق و نه‌ته‌وه‌یه‌كگرتووه‌كان گه‌یاندووه.
ڕێككه‌وتنه‌كه كه به‌ناوی (پاراستنی ئاسایشی سنوورەکانی نێوان عێراق و ئێران)ـه پێشتر له 19/3/2023 له‌نێوان راوێژکاری ئاسایشی نیشتمانی عێراق و سکرتێری ئەنجوومەنی باڵای ئاسایشی نیشتمانی ئێران له شاری به‌غدای پایته‌ختی عێراق به سەرپەرشتی محەممەد شیاع سوودانی سه‌رۆك وه‌زیرانی عێراق ئیمزا كرابوو.
کۆمێنت (0)
تا ئێستا هیچ کۆمێنتێک نەکراوە.