پێشبینی ده‌كرێ هه‌فته‌ی داهاتوو بارانی به‌خوڕ و هه‌وره‌بروسكه له هه‌رێمی كوردستان دروست بێت و پله‌كانی گه‌رماش به‌شێوه‌یه‌كی به‌رچاو دابه‌زن و له رۆژدا هه‌ست به كه‌شێكی فێنك بكرێت.
ئاراس جه‌بار شاره‌زای كه‌شناسی ڕایگه‌یاند: له سبه‌ی هه‌ینییه‌وه نزم بوونه‌وه‌ی پله‌كانی گه‌رما له هه‌رێمی كوردستان ده‌ست پێ ده‌كات بەھۆی نزیکبوونەوەی بارستە ھەوایەکی سارد لە دەریای ناوەراستەوە، پێشبینی دەکرێت سەنتەری ئەم بارستە ھەوایە رۆژانی سێشەمە و چوارشەمەی ھەفتەی داھاتوو بە تەواوی بگاتە سەر ناوچەکانمان كه بە ڕێژەیەکی بەرچاو کاریگەری لەسەر نزمبوونەوەی پلەکانی گەرما دەبێت.
ڕاشیگه‌یاند: پێشبینی ده‌كرێ پله‌كانی گه‌رما له دوای رۆژانی سێشه‌مه و چوارشه‌مه بەراورد بە کاتی ئێستا بۆ ھەر ناوچەیەک 6 تا 8 پلە نزم ببێتەوە، بەھۆی ئەو گۆڕانکارییە خێرایەش کە ڕوو دەدات، لە کاتەکانی رۆژدا ھەست بە فێنکی کەشەکە دەکرێت.
هه‌روه‌ها ڕایگه‌یاند: لەگەڵ ئەم بارستە ھەوایە رێژەیەکی مامناوەندی شێی بەرگە ھەوای لەگەڵ دەبێت کە ئەگەر ھەیە رۆژی سێشەمە ببێتە ھۆی بارانی پەرش و بڵاو لە ناوچە جیاجیاکانی تورکیا و باکوری کوردستان.
شاره‌زاكه‌ی كه‌شناسی گوتیشی: لە رۆژی چوارشەمە کاریگەری بارسته هه‌واكه درێژ دەبێتەوە بۆ سەر ناوچە شاخاوییەکانی پارێزگای ھەولێر و دھۆک بەتایبەت ناوچە سنوورییەکان، ئەگەری چربوونەوەی ھەور و بارانی پەرش و بڵاو بە ڕێژەی جیاواز دەبێت کە لە ھەندێ ناوچەدا ھەورەبروسکە و تاوی بە خوڕی باران دروست دەبێت.
کۆمێنت (0)
تا ئێستا هیچ کۆمێنتێک نەکراوە.