ئه‌مشه‌و سێشه‌م و كه‌مێك پێش ئێستا، هاكان فیدان وه‌زیری ده‌ره‌وه‌ی توركیا گه‌یشته فڕۆكه‌خانه‌ی نێوده‌وڵه‌تی به‌غدا و له‌لایه‌ن فوئاد حوسێن وه‌زیری ده‌ره‌وه‌ی عێراق پێشوازی لێ كرا.
بڕیاریشه سبه‌ی چوارشه‌م هاكان فیدان بگاته هه‌ولێر و له‌گه‌ڵ به‌رپرسانی هه‌رێمی كوردستان كۆببێته‌وه.
ئه‌حمه‌د سه‌حاف گوته‌بێژی وه‌زاره‌تی ده‌ره‌وه‌ی عێراق ڕایگه‌یاند: هاكان فیدان كه‌مێك پێش ئێستا به سه‌ردانێكی دوو رۆژه گه‌یشته شاری به‌غدای پایته‌خت.
بڕیاره وه‌زیری ده‌ره‌وه‌ی توركیا له‌گه‌ڵ هاوتا عێراقییه‌كه‌ی فوئاد حوسێن و هه‌رسێ سه‌رۆكایه‌تییه‌كه‌ی عێراق كۆ ببێته‌وه.
چاوه‌ڕوان ده‌كرێ هاكان فیدان له كۆبوونه‌وه‌كانیدا له‌گه‌ڵ به‌رپرسانی عێراق تاوتوێی چه‌ند بابه‌تێكی گرینگ بكات له‌وانه بابه‌تی ئه‌منی و سنوور و چه‌كدارانی په‌كه‌كه و پرسی ده‌ستپێكردنه‌وه‌ی هه‌نارده‌كردنی نه‌وتی هه‌رێمی كوردستان و دۆسییه‌ی ئاو و بازرگانی له‌نێوان هه‌ردوو وڵاتدا، ئه‌مه جگه ئاماده‌كارییه‌كان بۆ سه‌ردانه‌كه‌ی ره‌جه‌ب ته‌یب ئه‌ردۆگان سه‌رۆك كۆماری توركیا بۆ عێراق.
کۆمێنت (0)
تا ئێستا هیچ کۆمێنتێک نەکراوە.