به‌رگریی شارستانی هه‌ولێر هۆكاری زۆری سوتانی ئۆتۆمبێل له شاری هه‌ولێر ئاشكرا كرد و ڕایده‌گه‌یه‌نێت كه له سه‌ره‌تای ئه‌مساڵه‌وه تا ئێستا زیاتر له 170 ئۆتۆمبێل له سنووری شاری هه‌ولێر سوتاون.
سه‌ركه‌وت كاڕه‌ش گوته‌بێژی به‌رگریی شارستانی هه‌ولێر تایبه‌ت بۆ (كوردستان تیڤی) گوتی: ته‌نیا ئه‌مڕۆ دووشه‌م له سێ شوێنی جیاجیای شاری هه‌ولێر سێ ئۆتۆمبێل سوتاون.
گوتیشی: تیمه‌كانی به‌رگریی شارستانی به خێرایی گه‌یشتوونه‌ته شوێنی سوتانی ئۆتۆمبێله‌كان و ئاگره‌كه‌یان كوژاندۆته‌وه، زیانه‌كانیش خۆشبه‌ختانه گیانی نه‌بوون و ته‌نیا ماددی بوون.
هه‌روه‌ها گوتی: له سه‌ره‌تای ئه‌مساڵه‌وه تا ئێستا له‌سه‌ر ئاستی پارێزگای هه‌ولێر زیاتر له 170 ئۆتۆمبێل سوتاون.
سه‌ركه‌وت كاڕه‌ش سه‌باره‌ت به هۆكاری زۆری سوتانی ئۆتۆمبێل، ڕایگه‌یاند: هۆکارەکانی سووتانی ئۆتۆمبێل زۆرن، بەڵام دیارترینیان بریتین لەبەرزبوونەوەی پلەكانی گەرما، خراپی کوالێتی بەنزین، بوونی کێشە لە فویل پەمپ، دەستکاریکردنی ئۆتۆمبێل و پەستان خستنە سەر توانستی کارەبایی کە ئەمیش بە دانانی شاشەی ئایپاد و دانانی بلاجکتۆری بەهێز و دەستکاریکردنی وایەری کارەبایی ئۆتۆمبێله.
گوته‌بێژی به‌رگریی شارستانی هه‌ولێر داوای لە سەرجەم شۆفێران كرد رێنماییەکانی بەرگریی شارستانی وەک خۆی جێبەجی بکەن بۆ پاراستنی سەلامەتی خۆیان و رێگریکردن لە سووتانی ئۆتۆمبێلەکانیان. هه‌روه‌ها داوای له گه‌نجان كرد دووربکەونەوه لە دەستکاری ئۆتۆمبێلەکانیان بۆ مەبەستی جوانکاری.
کۆمێنت (0)
تا ئێستا هیچ کۆمێنتێک نەکراوە.