یانه‌ی نه‌سڕی سعوودی به ئه‌نجامی 3-1 گۆڵ له یانه‌ی ره‌جائی مه‌غریبی برده‌وه، به‌مه‌ش كریستیانۆ رۆناڵدۆی ئه‌ستێره و كاپتنی یانه‌كه له قۆناغی پێش كۆتایی جامی شا سه‌لمان، ڕووبه‌ڕووی ئاسۆ رۆسته‌م هێرشبه‌ری كوردی یانه‌ی شوڕته‌ی عێراقی ده‌بێته‌وه.
سه‌رله‌ئێواره‌ی ئه‌مڕۆ یه‌كشه‌م له قۆناغی 8ی پاڵه‌وانێتی جامی شا سه‌لمان، هه‌ردوو یانه‌ی نه‌سڕی سعوودی و ره‌جائی مه‌غریبی ڕووبه‌ڕووی یه‌كتر بوونه‌وه، ئه‌نجامی یارییه‌كه 3-1 گۆڵ بۆ به‌رژه‌وه‌ندی یانه سعوودییه‌كه كۆتایی هات.
كریستیانۆ رۆناڵدۆی ئه‌ستێره‌ی پورتوگالی له یارییه‌كه‌دا گۆڵێكی له خوله‌كی 19ی گێمی یه‌كه‌مدا بۆ یانه‌ی نه‌سڕ تۆمار كرد.
به‌مه‌ش له یاریی قۆناغی پێش كۆتایی پاڵه‌وانیه‌تییه‌كه‌دا كه بڕیاره رۆژی چوارشه‌می داهاتوو ئه‌نجام بدرێت، تیپه‌كه‌ی كریستیانۆ رۆناڵدۆ ڕووبه‌ڕووی هێرشبه‌ری كوردی یانه‌ی شوڕته‌ی عێراقی ئاسۆ رۆسته‌م ده‌بێته‌وه.
رۆناڵدۆ له پاڵه‌وانیه‌تییه‌كه‌دا تا ئێستا 3 گۆڵی تۆمار كردووه، له‌به‌رامبه‌ریشدا ئاسۆ ڕۆسته‌م 2 گۆلی هه‌یه و هه‌ردوو گۆڵه‌كه‌شی له یاریی ڕابردوو به‌رامبه‌ر به یانه‌ی سه‌دی قه‌ته‌ڕی تۆمار كرد كه تیپه‌كه‌ی یارییه‌كه‌ی به ئه‌نجامی 2-4 گۆڵ برده‌وه.
کۆمێنت (0)
تا ئێستا هیچ کۆمێنتێک نەکراوە.