كاردیناڵ لویس ساكۆ: هەرێمی كوردستان بەراورد بە ناوچەكانی دیكەی عێراق ناوچەیەكی ئارامە

لە بارەگای مەكتەبی سیاسی پارتی دیموكراتی كوردستان لە پیرمام، فازڵ میرانی، بەرپرسی دەستەی كارگێڕی مەكتەبی سیاسی، پێشوازی لە كاردیناڵ لویس ساكۆ، پاتریاركی كڵێسای كلدانی لە عێراق و جیهان كرد. 
لە دیدارەكەدا كە هەریەك هۆشیار زێباری، ئەندامی دەستەی كارگێڕی و ڕێبوار یەڵدا ئەندامی مەكتەبی سیاسی ئامادەیبوون، فازڵ میرانی وێڕای بەخێرهێنانی قەداسەتی پاتریارك ئاماژەی بەوەدا هەرێمی كوردستان ماڵی بەڕێزیان و هەر ئازادیخواز و دیموكراسیخوازێكە. 
لای خۆیەوە پاتریارك لویس ساكۆ، وێڕای دەربڕینی خۆشحاڵی خۆی بۆ ئەو دیدار و پێشوازییە، سوپاس و پێزانینی ئاراستەی جەنابی سەرۆك بارزانی و سەركردایەتی پارتی كرد بۆ هەڵوێستی مێژووییان لەبارەی ئەو غەدرەی كە لە خۆی و كڵێسای كلدانی و تەواوی مەسیحیەكان كرا لە عێراق، هەروەها هەرێمی كوردستانی بە ناوچەیەكی ئارام و جیاواز وەسفكرد بەراورد بە ناوچەكانی دیكەی عێراق و ئاماژەی بەوەدا كە لە هەرێمی كوردستان یاسا و سیستەم هەیە بۆیە هاووڵاتییان هەست بە ئاسایش و ئارامی دەكەن. 
فازڵ میرانی جەختیی كردەوە لەوەی هەڵوێستی جەنابی سەرۆك و پارتیمان لە باوەڕێكی نەگۆڕەوە هاتووە بۆ یەكتر قبوڵكردن و پێكەوەژیانی سەرجەم پێكهاتەكانی عێراق و، بوێری و هەڵوێستی بەڕێز پەتریاركی سەرباری ئەو ناحەقیبەی كە بەرامبەری كراوە بەرزنرخاند و، دووپاتیشی كردووە كە ئەو ناحەقییەی كرا تەنها غەدر‌ نەبوو لە بەڕێزیان‌، بەڵكو غەدرێكە بەرامبەر مەسیحیەكان و سەرجەم پێكهاتەكانی عێراق.