سه‌رۆكایه‌تی هه‌رێمی كوردستان بڵاوی كرده‌وه، ئه‌مڕۆ پێنجشه‌م نێچيرڤان بارزانى سه‌رۆكى هه‌رێمى كوردستان فه‌رمانێكى هه‌رێمى واژۆ كرد بۆ دياريكردنى ڕۆژى ئه‌نجامدانى هه‌ڵبژاردنى په‌رله‌مانى كوردستان.
به پێى فه‌رمانه هه‌رێمييه‌كه و ئه‌و ده‌سه‌ڵاته‌ى ياساى سه‌رۆكايه‌تيى هه‌رێمى كوردستان به سه‌رۆكى هه‌رێمى كوردستانى به‌خشيوه، نێچيرڤان بارزانى ڕۆژى 2024/2/25ى ساڵى داهاتووى بۆ هه‌ڵبژاردنى گشتيى بۆ خولى شه‌شه‌مى په‌رله‌مانى كوردستان ـ عێراق ده‌ستنيشان كردووه.
فه‌رمانه‌كه گشت لايه‌نه په‌يوه‌نديداره‌كان پابه‌ند ده‌كات به ئه‌نجامدانى كارى پێويست بۆ هاوكارى و هه‌ماهه‌نگى له‌گه‌ڵ كۆمسيۆنى باڵاى سه‌ربه‌خۆى هه‌ڵبژاردنه‌كان بۆ جێبه‌جێكردنى ئه‌م فه‌رمانه له ڕۆژى ده‌رچوونييه‌وه، هه‌روه‌ها له ڕۆژنامه‌ى فه‌رميدا بڵاو ده‌كرێته‌وه.
له‌مباره‌یه‌وه ئێواره‌ى ئه‌مڕۆ پێنجشه‌م دلشاد شهاب گوته‌بێژى سه‌رۆكايه‌تيى هه‌رێمى كوردستان له كۆنگره‌يه‌كى ڕۆژنامه‌وانيدا ده‌رباره‌ى واژۆكردنى فه‌رمانه‌كه، باسى له‌وه كرد كه واده‌ى هه‌ڵبژاردن دواى ڕاوێژ و گفتوگۆ له‌گه‌ڵ لايه‌نه سياسييه‌كان ديارى كراوه.
گوته‌بێژی سه‌رۆكایه‌تی هه‌رێم سه‌باره‌ت به دیاریكردنی رۆژه‌كه ئاماژه‌ی به‌وه‌ش دا كه سه‌رجه‌م حزب و لایه‌نه سیاسییه‌كانی هه‌رێمی كوردستان ڕازین كه هه‌ڵبژاردنی په‌رله‌مانی كوردستان له رۆژی 25ی شوباتی 2024 به‌ڕێوه بچێت.
کۆمێنت (0)
تا ئێستا هیچ کۆمێنتێک نەکراوە.