حكوومه‌تی هه‌رێم هاوکاری ته‌واوی تیمی نه‌ته‌وه‌یه‌كگرتووه‌كان ده‌كات بۆ ئه‌نجامدانی لێكۆڵێنه‌وه‌ له‌ تاوانه‌كانی داعش

رێکخەری راسپاردە نێودەوڵەتییەکان ئه‌مڕۆ پێنجشه‌م له‌میانه‌ی پێشكه‌شكردنی وتارێكدا له‌ شاری هه‌ولێر ڕایگه‌یاند كه‌ حكوومه‌تی هه‌رێمی كوردستان هاوکاری ته‌واوی تیمی نه‌ته‌وه‌یه‌كگرتووه‌كان ده‌كات بۆ ئه‌نجامدانی لێكۆڵێنه‌وه‌ له‌ تاوانه‌كانی داعش و دادگاییکردنیان و قەرەبووکردنەوەی قوربانییان و کەسوکاریان.

ئەمڕۆ پێنجشه‌م لە نۆیەمین ساڵیادی جینۆسایدکردنی کوردانی ئێزیدی بە سەرپەرشتی و ئامادەبوونی نێچیرڤان بارزانی سەرۆکی هەرێمی کوردستان لە شاری هەولێر مەراسیمێک ساز کرا.

لەم مەراسیمەدا د. دیندار زێباری رێکخەری راسپاردە نێودەوڵەتییەکان وتارێکی پێشکەش کرد و رایگەیاند: کارەساتی جینۆسایدی ئێزیدییەکان هەموو لایەکمان ناچار دەکات پابەند بین بۆ هێنانەدیی دادپەروەری بۆ کۆمەڵگەی ئێزیدی.

ڕاشیگه‌یاند: بەپێی راسپاردەکانی مسرور بارزانی سەرۆکی حکوومەتی هەرێم، نووسینگەی رێکخەری راسپاردە نێودەوڵەتییەکان ئەو پەڕی هاوکاری لە تیمی نەتەوە یەکگرتووەکان و ئالۆگۆڕی زانیاری دەکات بۆ کۆکردنەوەی زانیاری و داتا و دیکیۆمێنتکردنی بەڵگەکان بە مەبەستی ئەنجامدانی لێکۆڵینەوە لەسەر تاوانەکانی داعش و دادگاییکردنیان و قەرەبووکردنەوەی قوربانییان و کەسوکاریان.

هه‌روه‌ها ڕایگه‌یاند: حکوومەتی بەردەوام بووە لە یارمەتیدانی ئاوارەکان کە تا ئێستاش بە هۆی نەبوونی سەقامگیری لە ناوچەکانیان (135) هەزار و 860 کەسیان لە کەمپەکانی هەرێمی کوردستان دەژین.

رێکخەری راسپاردە نێوەدەوڵەتییەکان زیاتر گوتی: سوپاسی نەتەوەیەکگرتووەکان دەکەین کە کار لەسەر تاوانەکانی داعش دەکات و لە ساڵی 2017 تیمی یونیتاد دامەزرا بۆ لێکۆڵینەوە و گەیاندنی تاوانبارانی تاوانەکانی داعش و دادگاییکردنیان لەسەر تاوانە نێودەوڵەتییەکان.

گوتیشی: ئەم هەنگاوە مێژووییە ڕێگەی خۆش کرد بۆ ئەنجامدانی لێکۆڵینەوەیەی بەڵگەدار لەسەر تاوانەکانی داعش، لەمڕووەوە حکوومەتی هەرێم پابەندبوونی کریستیان ڕیتشەر سەرۆکی تیمی یونیتاد و تیمەکەی بەرز دەنرخێنێت.

سەبارەت بە هەوڵەکانی حکوومەت بۆ بە جینۆسایدناساندنی تاوانەکانی داعش، دیندار زێباری گوتی: حکوومەتی هەرێم بە هەماهەنگی لەگەڵ یونیتاد لە هەوڵی بەردەوامدایە بۆ کۆکردنەوەی بەڵگە لەسەر تاوانەکانی داعش بە ئامانجی دادگاییکردنی دادپەروەرانەی تاوانباران، هەروەها لیژنەیەکی وزاری باڵای پێکهێناوە بۆ بە جینۆسایدناساندنی تاوانەکانی داعش و هەوڵەکانی ئازادکردنی ڕفێندراوەکان بەردەوامە، لێرەشدا سوپاسی حکوومەتەکانی ئەڵمانیا و بەریتانیا و وڵاتانی تر دەکەین کە پێشتر تاوانەکانی داعشیان بە جینۆساید ناساندووە، ئەم دانپێدانانە هەنگاوێکی گرینگە، شان بەشانی هەوڵەکانی حکوومەتی هەرێم بۆ دامەزراندنی دادگایەکی تایبەتمەند بۆ ئەم مەبەستە، ئەمەش پێویستی بە پشتیوانی و پشتگیری هاوبەشە نێودەوڵەتییەکانمان هەیە.

سەبارەت بە پڕۆژەی بە دیجیتاڵکردنی بەڵگەکانیش گوتی: حکوومەتی هەرێم بە هەماهەنگی لەگەڵ یونیتاد پێشکەوتنی بەرچاوی بەدەستهێناوە لە بە دیجیتاڵکردن و پاراستنی بەڵگەی تاوانەکانی داعش، لەم رووەوە تا ئێستا زیاتر لە (100،000) لاپەڕە دیکیۆمێنت کراوە.

جه‌ختیشی كرده‌وه‌ كه‌ لە بارەی بونیادنانی توانای دادوەر و لێکۆڵەران سه‌باره‌ت به‌ تاوانە نێودەوڵەتییەکان و یاسای نێودەوڵەتی مرۆیی بە هەماهەنگی نووسینگەی رێکخەری راسپاردە نێودەوڵەتییەکان لەگەڵ لیژنەی نیشتمانی بۆ هەماهەنگی لەگەڵ یونیتاد (NCC) تا ئێستا (24) دادوەر و (7) داواکاری گشتی و (6) توێژەری دەروونی و کۆمەڵایەتی بەشدارییان لە خولی مەشقدا کردووە لە دەرەوە و ناوەوەی هەرێم.

رێکخەری راسپاردە نێودەوڵەتییەکان لە کۆتایی لێدوانەکەیدا ئاماژه‌ی به‌وه‌ دا كه‌، پێویستە پێکەوە کار بکەن بۆ ساڕێژکردنی برینەکانی ڕابردوو و دروستکردنی داهاتوویەکی دادپەروەرانەتر بۆ قوربانییانی تاوانەکانی داعش و دادگاییکردنی ئەنجامدەرانی ئەم تاوانانە.