درۆنی تورکیا ئۆتۆمبێلێکی چەکدارانی پەکەکەی لە سنووری قەزای شارباژێڕ کردۆتە ئامانج و 4 کوژراو و بریندارێکی لێکەوتووەتەوە.
بەپێی زانیارییەکانی دژەتیرۆری کوردستان، کاتژمێر 20:00ـی ئێوارەی ئەمڕۆ هەینی 28ـی 07ـی 2023 فڕۆکەی بێفڕۆکەوانی سوپای تورکیا ئۆتۆمبێلێکی چەکدارانی پەکەکەی لە نزیک گوندی ڕەنگینە لە دەڤەری شارباژێر لە پارێزگای سلێمانی کردووەتە ئامانج و بەهۆیەوە 4 چەکدار کوژران و چەکدارێکی دیکەش بریندار بوو.
سەلام عومەر، بەڕێوەبەری ناحییەی زەلان پێشووتر بۆ (کوردستان تیڤی) ئاماژەی بەوە دا کە بۆردومانی فڕۆکە بێ فڕۆکەوانەکە چوار کوژراوی لێکەوتووەتەوە.
هەروەها باسی لەوەش کردبوو کە هەر بەهۆی بۆردومانەکە بەشێک لە پوش و پاوانی ناوچەکەش ئاگری گرتووە و تیمەکانی بەرگری شارستانیش بۆ کۆنترۆڵکردنی ئاگرەکە گەیشتوونەتە شوێنی ڕووداوەکە.
کۆمێنت (0)
تا ئێستا هیچ کۆمێنتێک نەکراوە.