پێشنیوه‌ڕۆ ئه‌مڕۆ سێشه‌ممه 2023/7/25 نێچیرڤان بارزانى، سه‌رۆكى هه‌رێمى كوردستان، پێشوازى له كاردینال لویس ساكۆ، پاتریارك و سەرۆكی كەنیسەی كلدان لە عێراق و جیهان و شاندێكی یاوەری كرد.
له دیدارێكدا ده‌رباره‌ى كشاندنه‌وه‌ى فه‌رمانى سه‌رۆكایه‌تیى كۆمارى عێراقى تایبه‌ت به كه‌نیسه‌ى كلدانى، نێچیرڤان بارزانى دووپاتى كرده‌وه كه گرنگه عێراق به هه‌رێمى كوردستانه‌وه به خێمه‌یه‌ك بۆ كۆكردنه‌وه‌ى هه‌موو پێكهاته ئایینى و نه‌ته‌وه‌ییه‌كان بمێنێته‌وه و هیواى خواست به‌ڕێز سه‌ركۆمارى عێراقى فیدرال به زووترین كات ئه‌و كێشه‌یه چاره‌سه‌ر بكات.
سه‌رۆكى هه‌رێمى كوردستان جه‌ختى له‌وه كرده‌وه كه پێكهوهژیان و یه‌كترقبووڵكردن، بڕوا و پره‌نسیپه و جوانیى عێراق له‌وه‌دایه نیشتمانى هه‌موو پێكهاته‌كان بێت و تیایدا مافى هه‌مووان پارێزراو بێت.
لاى خۆیه‌وه كاردینال ساكۆ سوپاس و پێزانینى بۆ پشتیوانیى نێچیرڤان بارزانى ده‌ربڕى و دووپاتى كرده‌وه كه هه‌رێمى كوردستان سه‌رزه‌مینى پێكهوهژیان و یه‌كترقبووڵكردنه و شانازى پێوه ده‌كه‌ن. ئاماژه‌ى به‌وه‌ش دا كه ئه‌و كێشه‌یه هه‌رگیز ڕێگه له كار و ئه‌ركه‌كانى ناگرێت و به‌رده‌وام ده‌بێت له پارێزگاریكردن له عێراق و پێكهوهژیان.
دۆخى ده‌شتى نه‌ینه‌وا و چه‌ند پرسێكى دیكه‌ى په‌یوه‌ست به دۆخى كه‌نیسه و مه‌سیحییه‌كان به‌گشتى، لایه‌نێكى دیكه‌ى دیداره‌كه بوو كه وه‌زیرى ئه‌وقاف و كاروبارى ئایینیی حكوومه‌تى هه‌رێمى كوردستان، ئاماده‌ى بوو.
کۆمێنت (0)
تا ئێستا هیچ کۆمێنتێک نەکراوە.