كه‌شناسی: پله‌كانی گه‌رما هێشتا به‌رزتر ده‌بنه‌وه‌

به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی ڕه‌وشی كه‌شوهه‌وای ئه‌مڕۆ هه‌ینی و سبه‌ی شه‌ممه‌ی شاره‌كانی هه‌رێمی كوردستان بڵاو كرده‌وه‌ و تێیدا ئاماژه‌ی به‌وه‌ دا كه‌ له‌ هه‌ردوو رۆژه‌كه‌دا پله‌كانی گه‌رما به‌رز ده‌بنه‌وه‌ و كه‌شوهه‌وا زۆر گه‌رم ده‌بێت.

كه‌شناسی سه‌باره‌ت به‌ كه‌شوهه‌وای ئه‌مڕۆ هه‌ینی ڕایگه‌یاند: ئاسمان ساماڵ ده‌بێت و پله‌كانی گه‌رماش به‌ نزیكه‌یی 1 تا 2 پله‌ به‌رزتر ده‌بێت به‌راورد به‌ تۆماره‌كانی دوێنێ پێنجشه‌م.

ڕاشیگه‌یاند: خێرایی با له‌سه‌رخۆ و مامناوه‌ند ده‌بێت و ئاراسته‌كه‌شی به‌ره‌و باكوری خۆرئاوا ده‌بێت.

سه‌باره‌ت به‌ كه‌شوهه‌وای سبه‌ی شه‌ممه‌، كه‌شناسی ڕایگه‌یاند: ئاسمان ساماڵ ده‌بێت و پله‌كانی گه‌رما نزیك ده‌بێته‌وه‌ له‌ تۆماره‌كانی ئه‌مڕۆ هه‌ینی.

ئاماژه‌ی به‌وه‌ش دا كه‌ ئاراسته‌ی با به‌ره‌و باكوری خۆرئاوا ده‌بێت و خێراییه‌كه‌شی له‌سه‌رخۆ و مامناوه‌ند ده‌بێت.

به‌ڕێوه‌به‌رایه‌تی گشتیی كه‌شناسی و بوومه‌له‌رزه‌زانی به‌رزترین پله‌كانی گه‌رمای شاره‌كانی به‌مشێوه‌ی خواره‌وه‌ دیاری كرد:-

هەولێر: 46 پلەى سیلیزى

سلێمانی: 42 پلەى سیلیزى

دهۆک: 44 پلەى سیلیزى

کەرکووک: 47 پلەى سیلیزى

هەڵەبجە: 46 پلەى سیلیزى

حاجی ئۆمەران: 30 پلەى سیلیزى

زاخۆ: 44 پلەى سیلیزى

سۆران: 42 پلەى سیلیزى

گەرمیان: 48 پلەى سیلیزى