جێگری پارێزگاری نەینەوا: پلانی جددی ھەیە كە ناوەڕۆكی رێككەوتننامەی شنگال بەم نزیكانە جێبەجێ بكرێت

رەفعەت سمۆ رەشۆ، جێگری پارێزگاری نەینەوا لە لێدوانێكیدا گوتی: بێگومان گەورەترین زیانلێكەوتووانی دەستی داعش بریتیین لە ئێزدییەكانی قەزای شنگال كە تیایدا ژنەكان رفێندران و دەستدرێژییان كرایەسەر، منداڵەكانیشیان چەكدار كران و چەندین تاوانی دژبە مرۆڤایەتییان ئەنجامدا، دوای ئازادكردنی قەزاكە و بوونی چەندین هێزی چەكداریی، ئێستا رێككەوتننامەیەك سەبارەت بە ئاساییكردنەوەی دۆخی شنگال لەنێوان حكوومەتی عێراق و حكوومەتی هەرێم واژوو كراوە، بەڵام رێككەوتننامەكە وەك خۆی جێبەجێ نەكراوە، بەهۆی ئەوەی هەندێك لایەنی نایاسایی لە شنگال هەن كە دەستیان بەسەر ناوچەكەدا گرتووە.
گوتیشی: پلانی جیددی هەیە كە ناوەڕۆكی رێككەوتننامەكە بەم نزیكانە جێبەجێ بكرێت و هەنگاوی یەكەم گەڕانەوەی ئاوارەكانە بۆسەر زێدی خۆیان، هەرچەندە ماڵ و خانووەكان هەموو رووخاوە، بەڵام فەرمانگەی قەرەبووكردنەوەی ئێزدییەكان لە قەزای شنگال هەیە و دەبێت لەوێ داوای قەرەبووكردنەوە بكەن و قەرەبوو بكرێنەوە، چونكە ئێزدییەكان ماوەی نۆ ساڵە لەژێر خیوەتی كەمپەكان ژیان بەسەر دەبەن .
جێگری پارێزگاری نەینەوا ئاماژەی بەوەیش كرد كە بابەتە زیاتر ئەمنییە تا خزمەتگوزاری لەگەڵ ئەوەشدا چارەسەركردنی بابەتەكە پەیوەستە بە حكوومەتی ناوەندییەوە و گوتی: دۆسییەكە مەركەزییە و پەیوەستە بە حكوومەتی ناوەندەوە، هەر كێشەیەك هەبێت هیوادارم چارەسەر بكرێت بۆ ئەوەی خەڵكەكە بگەڕێتەوە سەر زێدی خۆیان، بابەتەكە ئەمنییە و پەیوەندی بە دۆسییە ئەمنییەكانەوە هەیە بەجۆرێك پێویستە سەرەتا دۆسیەی ئەمنیی چارەسەر بكرێت، دواتر خزمەتگوزاری بۆ ناوچەكە دابین بكرێت.