ئۆكڕاینا لەناوبردنی یەكەیەكی سەربازی ڕوسیای لە دۆنێتسك ڕاگەیاند

سوپای ئۆكڕاینا لەناوبردنی یەكەیەكی سەربازیی ڕووسیای لە شاری ماكیڤكا لە ناوچەی دۆنێتسكی ژێر دەسەڵاتی مۆسكۆ لە هێڵی پێشەوە ڕاگەیاند.
لە بەیاننامەیەكی هێزە چەكدارەكانی ئۆكڕاینا كە درەنگانی ڕۆژی سێشەممە بڵاوكرایەوە، هاتووە: لە ئەنجامی بۆردومانی هێزەكانی بەرگری، یەكەیەكی سەربازی ڕووسیامان لە شاری ماكیڤكا لە ناوچەی دۆنێتسكی ژێر دەسەڵاتی مۆسكۆ لە هێڵی پێشەوە لەناوبردووە.
لەوبارەیەوە دێنیس پوشیلین،سەرۆكی كۆماری گەلی دۆنێتسك ڕایگەیاند : هێزەكانی ئۆكڕاینا هێرشی توندیان بۆ سەر ناوچە نیشتەجێبوونەكان و كۆمەڵگەیەكی نەخۆشخانەكان لە ماكێڤكا دەستپێكردووە.
هەروەها ئاژانسی هەواڵی "ئینتەرفاكس"ی ڕووسی بڵاویكردەوە، لە ئەنجامی هێرشەكانی ئۆكڕاینا كەسێك كوژراوە و 36 هاوڵاتی مەدەنی برینداربوون.
هاوكات ئاژانسی هەواڵی "تاس"ی ڕووسی، بڵاویكردەوە كە لە ئەنجامی بۆردومانەكەی هێزەكانی ئۆكڕاینا ، نۆ دامەزراوەی چاودێری تەندروستی زیانیان بەركەوتووە.