ئه‌مڕۆ سێشه‌م وه‌زاره‌تی "الأمر بالمعروف والنهي عن المنكر" له ئه‌فغانستان له‌سه‌ر داوای بزووتنه‌وه‌ی تاڵیبان بڕیاری دا سه‌رجه‌م ئارایشتگه و شوێنه‌كانی ته‌جمیل و جوانكاری ئافره‌تان دابخرێت، بۆ جێبه‌جێكردنی بڕیاره‌كه‌ش ماوه‌ی یه‌ك مانگ مۆڵه‌ت درا به خاوه‌ن ئارایشتگاكان.
محه‌مه‌د سادق عاكف گوته‌بێژی وه‌زاره‌ته‌كه له كۆنگره‌یه‌كی رۆژنامه‌وانیدا گوتی: ماوه‌ی یه‌ك مانگ له‌به‌رده‌م ئارایشتگه و شوێنه‌كانی جوانكاری ده‌بێت بۆ داخستنی سه‌رجه‌م شوێنه‌كانیان.
ئه‌مه له‌كاتێكدایه كه ده‌سه‌ڵاتدارانی تاڵیبان ساڵی ڕابردوو به‌شی زۆری زانكۆ و ناوه‌نده‌كانی خوێندنی له‌به‌رده‌م ئافره‌تان داخست و چیتر رێگه‌ی نه‌دا ئافره‌تان له فه‌رمانگه و شوێنه بازرگانییه‌كان كار بكه‌ن، هه‌روه‌ها چوونی چه‌ندان شوێنی گشتیشی بۆ ئافره‌تان قه‌ده‌غه كرد وه‌ك حه‌مامی گشتی و پاڕك و شوێنه‌كانی وه‌رزش و یاریكردن و كاتبه‌سه‌ربردن.
ئه‌م ڕێگری و قه‌ده‌غه‌كردنانه له‌به‌رده‌م ئافره‌ت بووه‌ته جێگه‌ی نیگه‌رانی وڵاتانی بیانی و ئه‌مه‌ریكا و چه‌ندان جار به فه‌رمی داویان له بزووتنه‌وه‌ی تاڵیبان و حكوومه‌تی ئه‌فغانستان كردووه سنوورێك بۆ ئه‌م رێگرییانه دابنرێت و چیتر سنوور له‌به‌رده‌م ئافره‌تان دانه‌نرێت.
کۆمێنت (0)
تا ئێستا هیچ کۆمێنتێک نەکراوە.