ئه‌مڕۆ دووشه‌م له قوتابخانه‌یه‌كی شارۆچكه‌ی خورماتوو قوتابییه‌ك هێرش ده‌كاته سه‌ر مامۆستاكه‌ی و به قامه و چه‌قۆ سه‌ری ده‌شكێنێت، وه‌زیری په‌روه‌رده‌ی عێراقیش فه‌رمانی كردووه قوتابییه‌كه ده‌ستگیر بكرێت.
ڕووداوه‌كه كاتێك ڕوویداوه كه ئه‌مڕۆ دووشه‌م مامۆستاكه قۆپییه و غه‌شی له قوتابییه‌كه گرتووه، قوتابییه‌كه چووه‌ته ماڵه‌وه و چه‌قۆ و قامه‌ی هێناوه و به ماتۆڕسكیل و به خێرایی گه‌ڕاوه‌ته‌وه قوتابخانه.
كاتێكیش گه‌یشتۆته قوتابخانه، ڕاسته‌وخۆ به قامه و چه‌قۆ په‌لاماری مامۆستاكه‌ی داوه و سه‌ری شكاندووه و له چه‌ند شوێنێكی جه‌سته‌ی بریندار كردووه، هه‌ر به‌وه‌شه‌وه نه‌وه‌ستاوه و هه‌ڕه‌شه‌ی كوشتنیشی له مامۆستاكه كردووه.
هه‌ر دوای ڕووداوه‌كه وه‌زیری په‌روه‌رده‌ی عێراق هاتۆته سه‌ر خه‌ت و بڕیاری داوه لیژنه‌یه‌ك بۆ به‌دواداچوون له‌سه‌ر ڕووداوه‌كه پێك بهێنێت.
وه‌زیری په‌روه‌رده داواشی له هێزه‌كانی پۆلیسی خورماتوو كردووه به زووترین كات قوتابییه‌كه ده‌ستگیر بكه‌ن و بیده‌نه دادگه، هه‌روه‌ها بڕیاریشیداوه بۆ ئه‌مساڵی خوێندنی قوتابییه‌كه به ده‌رنه‌چوون بۆ هه‌ژمار بكرێت.
کۆمێنت (0)
تا ئێستا هیچ کۆمێنتێک نەکراوە.