لە دھۆك نەخۆشخانەیەك بۆ چارەسەركردنی تووشبووانی شێرپەنجە دروست دەكرێت

ئەمڕۆ لە شاری دھۆك، بە گوژمەی 371 ھەزار دۆلار، بەردی بناغەی نۆژەنكردنەوەی نەخۆشخانەی فریاكەوتنی دھۆك دانرا كە بڕیارە بكرێتە نەخۆشخانەیەك بۆ چارەسەركردنی تووشبووانی شێرپەنجە.
لە رێوڕەسمەكەدا پارێزگاری دھۆك عەلی تەتەر و بەرێوەبەری گشتیی تەندروستی دھۆك ئەفراسیاب موسا و بەرپرسانی حكوومی ناوچەكە بەشدار بوون.
نەخۆشخانەكە زیاتر لە 130 قەرەوێڵە و چوار ژووری نەشتەرگەری لەخۆدەگرێت، ئەمە جگە لەوەی كە تاقیگە و 10 قەرەوێڵەی چاودێری چڕی تیادایە.
لەمبارەیەوە عەلی تەر، پارێزگاری دھۆك گوتی: دوای تەواوبوونی نەخۆشخانەی شێرپەنجەی دھۆك، ئیتر زۆربەی زۆری تووشبووانی نەخۆشی شێرپەنجە لە دھۆك لە بری ئەوەی بۆ وەرگرتنی چارەسەر بچن بۆ سلێمانی و ھەولێر، دەتوانن لە نەخۆشخانەی شێرپەنجەی دھۆك چارەسەر وەربگرن.
بەگوێرەی دوایین ئاماری وەزارەتی تەندروستی لە ھەرێمی كوردستان، نۆ ھەزار و 61 حاڵەتی شێرپەنجە تۆماركراون، لە پارێزگای سلێمانی سێ ھەزار و 323 و لە ھەولێر، چوار ھەزار و 304 كەس و لە دھۆك، ھەزار و 434 كەس تووشی نەخۆشی شێرپەنجە بوون.