هیوای سه‌لامه‌تی بۆ هونه‌رمه‌ندی ژه‌نیار "جان تۆماس " ده‌خوازین

هونه‌رمه‌ندی ژنیاری كوردستان "جان تۆماس جان" ماوه‌یه‌كه‌ باری ته‌ندروستی باش نییه‌،نه‌شته‌گه‌رییه‌كی گه‌وره‌ی بۆكراوه‌. 
هونه‌رمه‌ند "جان تۆماس " به‌هۆی نه‌خۆشی دڵه‌وه‌،له‌ڕێكه‌وتی ٢٠٢٣/٦/١٢ له‌نه‌خۆشخانه‌ی سه‌نته‌ری دڵ له‌شاری هه‌ولێر نه‌شته‌رگه‌ری گۆڕینی ده‌ماری دڵ (كرانه‌وه‌ی سینگ) ی بۆ كراوه‌ .
له‌ ئێستادا، له‌ چاودێری چڕ ده‌رچووه‌،باری ته‌ندورستی هێشتا جێگیر نییه‌ ،هیودارین به‌سه‌لامه‌تی بگه‌ڕێته‌وه‌ ناوخانه‌واده‌ وئازیزانی و ئامێری كه‌مانچه‌كه‌ی بگرێته‌وه‌ ئامێز خوای گه‌وره‌ ته‌مه‌نداری و پڕته‌ندروستی پێ ببه‌خشێت.

هونه‌رمه‌ند جان تۆماس، له‌ ڕێكه‌وتی ( 4/4/1947) له‌خانه‌واده‌یه‌كی هه‌ژاری زه‌حمه‌تكێش له‌شاره‌ شیرینه‌كه‌ی كۆیه‌ له‌دایكبووه‌، ( تۆماس جانۆ ی باوك و ڕۆمێ ی دایك) له‌نێو باوه‌شی پڕ سۆزو خۆشه‌ویستی خۆیان ئه‌م كۆرپه‌له‌ ئازیزه‌یان ده‌لاوێننه‌وه‌و خزمه‌تی ده‌كه‌ن، له‌گه‌رماو سه‌رما ده‌یپارێزن تا ده‌گاته‌ ئه‌و ئاسته‌ی ، ته‌مه‌نی گونجاوه‌ وه‌ك هه‌رمنداڵێكی ئاسایی نێو كۆڵان و گه‌ڕه‌كه كه‌‌یان به‌ره‌و ده‌رگای قوتابخانه‌  هه‌نگاو بن

هونه‌رمه‌ند دوای ته‌واو كردنی په‌یمانگای مامۆستایان له‌سلێمانی و به‌ده‌ستهێنانی بڕوانامه‌، ده‌گه‌ڕێته‌وه‌ لیوای هه‌ولێر و له‌ شارۆچكه‌ی ( هاودیان ) داده‌مه‌زرێت، هه‌رله‌وێش ژیانی هاوژینی پێك دێنێ.

وێستگه‌كانی ژیانی هونه‌ری هونه‌رمه‌ند جان تۆماس :

1/ له‌ساڵی 1966 تا 1968 له‌گه‌ڵ هونه‌رمه‌ندانی تیپی مۆسیقای سلێمانی  كاری هونه‌ری كردووه‌.

2/له‌ساڵی 1972  تا 1974 ئه‌ندامی ده‌سته‌ی به‌ڕێوه‌بردنی تیپی مۆسیقای باواجی كۆیه‌ بووه‌.

3/ له‌ به‌هاری ساڵی 1974 به‌شداری یه‌كه‌مین میهره‌جانی هونه‌ری كوردی كردووه‌ له‌شاری به‌غداد.

4/   له‌ساڵی 1976 تا 1979 له‌گه‌ڵ مامۆستا ( یوسف باكووری) دامه‌زرێنه‌ری تیپی ( جۆزیف تریۆ) بووه‌.

5/ له‌ساڵی 1977 تا 1980 ئه‌ندامی ده‌سته‌ی به‌ڕێوه‌بردنی تیپی مۆسیقای هونه‌ری هه‌ولێر بووه‌.

6/ له‌ساڵی 1980 تا 1984 سه‌رپه‌رشتیاری تیپی مۆسیقای خانزاد بووه‌.

7/ له‌هه‌موو چالاكی و میهره‌جانه‌كانی چالاكی قوتابخانه‌كان له‌ كوردستان و عێراق به‌شداری كردووه‌.

8/ هونه‌رمه‌ند له‌ساڵی 1976 له‌به‌ڕێوه‌به‌رایه‌تی چالاكی قوتابخانه‌كانی هه‌ولێر دامه‌زراوه‌.

9/ ئه‌ندامی ده‌سته‌ی كارگێڕی ئۆركێسترای كوردستان بووه‌.

10/ سه‌رپه‌رشتیاری په‌روه‌رده‌یی و له‌ساڵی (1977) بۆته‌ ئه‌ندامی سه‌ندیكای هونه‌رمه‌ندانی لقی هه‌ولێر  و ، له‌ساڵی (2001) بۆته‌ سه‌رۆكی لقی هه‌ولێری سه‌ندیكای هونه‌رمه‌ندانی كوردستان‌.

هونه‌رمه‌ند جان تۆماس وه‌ك مامۆستا و فێركارێك به‌شداری چه‌ندین خولی فێربوونی مۆسیقای كردووه‌.

هونه‌رمه‌ند خاوه‌ن مێژوویه‌كی جوانی پڕ به‌خششه‌ ‌ له‌گه‌ڵ هاوڕێ هونه‌رمه‌نده‌كانی له‌ تیپه‌ مۆسیقیه‌كانی  وه‌ك ( تیپی باواجی كۆیه‌ ، تیپی هونه‌ری هه‌ولێر ، تیپی مۆسیقای سلێمانی  و تیپی خانزاد و تیپی باكووری ڕۆژئاوایی) هه‌روه‌ها خاوه‌ن خامه‌یه‌كی جواننوسییه‌ ده‌رباره‌ی هونه‌ری مۆسیقا بابه‌تی له‌گۆڤار و ڕۆژنامه‌كاندا بڵاوكردۆته‌وه‌ و ، خاوه‌نی كتێبێكه‌ به‌ناوی ( ڕه‌زمه‌كانی مۆسیقای كوردی ) له‌ساڵی (1998) چاپكراوه‌و كتێبخانه‌ی كوردی پێ ده‌وڵه‌مه‌ندكردووه‌.