ئەمریكا ژمارەیەك فڕۆكەی جەنگیی ئێف-22ی بۆ رۆژهەڵاتی ناوەڕاست رەوانە كرد

ئەمریكا بە پاساوی "چالاكییە نائەمنییەكانی" فڕۆكەكانی رووسیا لە ناوچەكە، ژمارەیەك فڕۆكەی جەنگیی ئێف-22ی بۆ رۆژهەڵاتی ناوەڕاست رەوانە كردووە.
فەرماندەیی ناوەندی هێزەكانی ئەمریكا راگەیەندراوێكی بڵاو كردووەتەوە كە تیایدا هاتووە: لە بەرامبەر زیادبوونی هەڵسوكەوتی ناپیشەیییانە و نائەمنییانەی فڕۆكەكانی رووسیا لە ناوچەكە هێزە ئاسمانییەكانی ئەمریكا وەك بەشێك لە توانا و پشتیوانی بەرفراوان ژمارەیەك فڕۆكەی جەنگیی ئێف-22ی بۆ ناوچەی ئەركداری فەرماندەیی ناوەندی هێزەكانی ئەمریكا لە رۆژهەڵاتی ناوەڕاست رەوانە كردووە.
لە راگەیەندراوەكەدا ئاماژە بە گوتەكانی فەرماندەی فەرماندەیی هێزەكانی ناوەندی ئەمریكا، جەنەراڵ مایكڵ كوریللا دراوە كە گوتوویەتی: چالاكییە نائەمنییەكانی رووسیا ناپیشەییانەن و لە چالاكییەكانی هێزێكی ئاسمانی پیشەییانە ناوەشێنەوە، بەردەوام پێشێلكارییەكانی رووسیا دەبێتە هۆی تەشەنەسەندنی زیاتری گرژییەكان.