مەکتەبی ڕێکخستنی پارتی دیموکراتی کوردستان لە کەرکووک – گەرمیان ڕاگەیەنراوێکی بەبۆنەی ساڵیادی ڕزگارکردنی کەرکووک لەدەستی ڕژێمی بەعس بڵاو کردەوە و دەڵێت، لەم یادەدا بەڵێن بە جەماوەری خۆمان لە کەرکووک دەدەین کە سازش ناکەین و کۆڵ نادەین لەپێناو چەسپاندنی ئاسایش و خۆشگوزەرانی لە کەرکووک.
د. کەمال کەرکووکی بەرپرسی مەکتەبی ڕێکخستنی پارتی دیموکراتی کوردستانی کەرکووک – گەرمیان لە ڕاگەیەنراوێک دەڵێت: پڕۆسەی ڕزگارکردنی (کەرکووک) و ڕێکارەکانی هاوشانی ئەم پڕۆسەیە کە شارەکە و ئاسایش و سەلامەتی خەڵکەکەیان پاراست، دەربڕینی ڕاستەقینە و کردەیی بوون بۆ بیر و ئاراستەکانی سەرکردەی نەمر مستەفا بارزانی، کە هەمیشە جەختی لەوە دەکردەوە کە (کەرکوک) دڵی کوردستانە.
دەقی پەیامی مەکتەبی ڕێکخستنی پارتی دیموکراتی کوردستانی کەرکووک – گەرمیان بەبۆنەی ساڵیادی ڕزگارکردنی کەرکووک:-
ئەمڕۆ (٢٠) بیست ساڵ بەسەر یادی ڕزگارکردنی شاری (کەرکووک) لە دەستی دیکتاتۆرییەت تێدەپەڕێت، ئەو بۆنەیەی تیایدا هەڵمەتی جەماوەرەکەمان و هێزی پێشمەرگەی قارەمان و ڕێکخستنەکانی ناوخۆی پارتیمان لە تابلۆیەکی ویژدانیدا ئاوێتەی یەکتر بوون و ئەو ڕۆژە پیرۆزەیان بە زیندوویی ڕاگرت، ئەوە بوو هێزی پێشمەرگە لە ژێر ئاڵای کوردستان دەستیان بە جووڵەو ئامادەکاری کردبوو بۆ ڕزگارکردنی شارەکە لەگەڵ دەستپێکی ئۆپەراسیۆنەکانی هاوپەیمانیی نێودەوڵەتی بۆ ڕووخاندنی ڕژێمی پێشوو، چونکە ڕزگارکردنی (کەرکوک) سیمبولێکی گرنگی کۆتاییهێنان بوو بە ڕژیمی بەعسی دیکتاتۆرو ئاماژەی مێژوویی قووڵی بۆ گەلی کورد هەبوو کە بە دەست خراپترین سیاسەتی سەرکوتکاری و ستەمکارییەوە دەیناڵاندو لە هەڵمەتەکانی ڕاگواستنی زۆرەملێ و بەعارەبکردن و گۆڕینی دیمۆگرافیاو ئۆپەراسیۆنەکانی ئەنفالدا، خۆیان نواند.
ئەوە بوو ڕزگارکردنی شارەکە لە ڕۆژی 10ی نیسانی 2003دا بە ئازایەتی پێشمەرگەو کۆششی خەباتگێڕان و هاووڵاتیانی دڵسۆز، بەدی هات بەبێ هیچ هاوکارییەک یان دەستێوەردانێکی سەربازیی هێزەکانی هاوپەیمانیی نێودەوڵەتی، بۆ ئەوەی ببێتە سیمبولێکی نیشتمانیی نوێ و بچێتە سەر خەرمانی دەسکەوتەکانی خەباتی گەلی کورد.
لە کاتێکدا هەندێک ئەجێندای ناوچەیی و نێودەوڵەتی چاوەڕوانی ڕوودانی شەڕی نەتەوەیی و تایەفەگەری نێوان پێکهاتەکانی شارەکە بوون و چاوەڕوانی ئەنجامدانی کردەوەی تۆڵەسەندنەوە بوون وەک وڵامێک بۆ سیاسەتە دڕندانەکانی ڕژێمی لەناوچوو. هێزی قارەمانی پێشمەرگە، کاتێک چوونە ناو شارو کۆنترۆڵیان کرد، جوانترین وێنەی قارەمانێتی و جوامێرییان پێشان داو، بەبێ خوێنڕشتن و ڕووبەڕووبوونەوە لە نێوان پێکهاتەکانی شاردا، شارەکەیان کۆنترۆڵ کرد. ئەمەیش ئاماژەیەکی ڕوونی ئاستی تەبایی نێوان پێکهاتە کۆمەڵایەتییەکانی شارەکەو تامەزرۆییان بوو بۆ ڕزگاربوون لە چەوسانەوەو دیکتاتۆرییەت، هەروەها بەڵگەی جوامێری گەلی کوردو هێزی پێشمەرگەی قارەمانە کە پێیان باشتر بوو ئاشتی و ئاسایش و پاراستنی موڵک و ماڵی گشتی و بناغەکانی سەردەمێکی نوێ لەم شارە دێرینەدا بچەسپێنن کە تیایدا ئازادییەکان و ناسنامە نەتەوەیی و ئایینییەکان، ڕێزلێگیراو بن.
پڕۆسەی ڕزگارکردنی (کەرکوک)و ڕیکارەکانی هاوشانی ئەم پڕۆسەیە کە شارەکەو ئاسایش و سەلامەتی خەڵکەکەیان پاراست، دەربڕینی ڕاستەقینە و کردەیی بوون بۆ بیرو ئاراستەکانی سەرکردەی نەمر مستەفا بارزانی، کە هەمیشە جەختی لەوە دەکردەوە کە (کەرکوک) دڵی کوردستانە و، بزووتنەوەی ڕزگاریخوازی کورد ڕێز لە هەموو گەلان دەگرێت و خەباتی ئێمە دژی گەلان نیە بگرە دژی دەسەڵاتە سەرکوتکەرەکانەو لە بەرژەوەندی هەموو پێکهاتەکانی کوردستانە کە بە ئاشتییانە پێکە دەژین. باوکی رۆحی دۆزی کورد، هەرگیز سازشی لەسەر کوردستانیبوونی (کەرکوک) یان دۆزی گەلەکەی نەکردووەو، لە سەردەمی خەباتی خۆیدا هەرگیز نائومێدیی نەزانیوە. ئێمەش، لە پارتی دیموکراتی کوردستان و، بە سەرکردایەتی برای تێکۆشەر رێزدار سەرۆک مەسعود بارزانی، کوردستانیبوونی (کەرکوک) چەقی خەباتی ئێمەیەو، ماندوونەناسانە کار بۆ ڕزگارکردنی شارەکە دەکەین لەو هەموو دۆخە نائاساییەی لەم ڕۆژانەدا بە سەر ئەم پارێزگا ستەملێکراوە سەپێندراون و، بۆ گەڕاندنەوەی ژیانی سروشتیی دوور لە سیاسەتی شۆڤێنی و پڕۆسەی ڕێکخراوی بەعارەبکردن و وتاری ڕەگەزپەرستانەی هەندێک لەو سیاسییانەی دەیانەوێت بەو جۆرەو، لەسەر حیسابی ئاسایش و سەلامەتی شارەکەو پێکهاتە کۆمەڵایەتی و مێژووییەکەی و ناسنامە ڕەسەنە کوردستانییەکەی، خۆیان بچەسپێنن و دەستکەوتی کاتی و بەرتەسکی هەڵبژاردن بۆ خۆیان بەدەست بهێنن.
لە یادی ڕزگارکردنی کەرکووکی خۆشەویستدا بەڵێن بە جەماوەری خۆمان لە (کەرکوک) دەدەین کە سازش ناکەین و کۆڵ نادەین لەپێناو چەسپاندنی ئاسایش و خۆشگوزەرانی لە (کەرکوک)و، بە گرتنەبەری هەموو ڕێگەیەکی دیموکراسی و سیاسی و یاسایی بەردەست، کار بۆ بەدەستهێنانی مافە ڕەواکانی گەلی کوردو مافەکانی هەمووان دەکەین.
دروودو سڵاو بۆ گیانی پاکی شەهیدانی کوردو کوردستان لە (کەرکوک)و گشت ناوچەکانی کوردستان و، سڵاو بۆ گیانی قوربانیانی ئەنفال و جینۆسایدو خانەوادە بەڕێزەکانیان.
دکتۆر کەمال کەرکووکی
بەرپرسی م. ر. پارێزگای کەرکووک – گەرمیان
10ی نیسانی 2023
کۆمێنت (0)
تا ئێستا هیچ کۆمێنتێک نەکراوە.