ڤیدیۆ.. كچێك و دایكی دوای 160 كاتژمێر رزگاركران

تیمێكی فریاگوزاری توانیان كچێك و دایكی لە ژێر داروپەردووی باڵەخانەیەكی ڕووخاو دەربهێنن، ئەمەش دوای 160 كاتژمێر لە بوومەلەرزە وێرانكەرەكە گیریان خواردبوو .
ئاژانسی هەواڵی ئەنادۆڵ لە كاتی ئۆپەراسیۆنی ڕزگاركردنەكەدا ڤیدیۆیەكی لە تویتەر بڵاوكردەوە، كچەكەش ڕایگەیاند كە ناوی "لینا ماردینی" بووە، و تەمەنی 11 ساڵە.
كچەكە و دایكی بە تیمەكانی فریاكەوتنیان وتووە كە سەرجەم ئەندامانی خێزانەكەیان لە ئەنجامی بوومەلەرزەكەدا گیانیان لەدەستداوە و هیچ یەك لە كەسوكارەكانیش نەماون.
هەروەها لە ڤیدیۆكەدا دەردەكەوێت كە تیمێكی پزیشكی فریاگوزاری سەرەتایی بۆ كچەكە و دایكی دەكەن، دوای ئەوەی لە ژێر داروپەردوودا دەرهێنراون.
جێگای سەرنجە كە ژمارەی ئەوانەی بەهۆی بوومەلەرزەكەوە لە توركیا و سوریا گیانیان لەدەستداوە بەردەوام بەرز دەبێتەوە و تەنها لە توركیا زیاتر لە 30 هەزار حاڵەتی گیان لەدەستدان تۆماركراوە.