سەرۆکی ئەرکان لەگەڵ فەرماندەی فرقەی 14ی فەرماندەیی ئۆپەراسیۆنە هاوبەشەکانی نەینەوا کۆبووەوە

ئەمڕۆ22ی حوزەیرانی 2022، فەریق روکن عیسا عوزێر سەرۆکی ئەرکانی وەزارەتی پێشمەرگە، پێشوازی لە لیوا روکن عه‌بدوڵڵا جبووری فەرماندەی فرقەی (14)ی فەرماندەیی ئۆپەراسیۆنەکانی نەینەوا و شاندێکی یاوەری کرد.
لەو دیدارەدا، شاندی میوان پیرۆزباییان لە فەریق روکن عیسا عوزێر کرد، بەبۆنەی وەرگرتن و دەست بەکاربوونی وەک سەرۆکی نوێی سەرۆکایەتی دەستەی ئەرکان لە وەزارەتی پێشمەرگە.
دواتر گفتوگۆ دەربارەی هەماهەنگی و پەیوەندییەکانی نێوان وەزارەتی پێشمەرگە و وەزارەتی بەرگری عێراق کرا، بەتایبەت لەو ناوچانەی، کە بۆشایی ئەمنی هەیە لەنێوان هێزی پێشمەرگەی کوردستان و سوپای عێراقیدا.
لەلای خۆیەوە، سەرۆکی ئەرکان سوپاسی شاندی میوانی کرد، جەختی کردەوە، لەسەر بەردەوامی دان بە هاوکاری و هەماهەنگی ئەمنی لەنێوان هێزی پێشمەرگە و سوپای عێراق، هاوکات دووپاتیشی کردەوە بۆ بەرقرار کردنی ئارامی و سەقامگیری ناوچەکە، پێویستمان بە کاری هاوبەش و هەمەلایەنە هەیە.