کێشەکانی هاتووچۆی گەشتیاران لەنێوان هەرێمی کوردستان و تورکیا چارەسەر دەکرێت و بڕیارە جموجۆڵی گەشتیاریش زیاتر پەرەی پێ بدرێت.
بەڕێوەبەرایەتی دەروازەی سنووری نێودەوڵەتیی ئیبراهیم خەلیل ڕایگەیاند: لەسەر ئاستی باڵای حکوومەتی ھەرێمی کوردستان لەگەڵ لایەنەکانی وڵاتی تورکیا لەسەر ئاستی باڵا و ئیداری چەندین کۆبوونەوە بۆ چارەسەرکردنی کێشەکانی هاتووچۆی گەشتیاران زنجیرە کۆبوونەوەیەکی گرنگ لەگەڵ لایەنەکانی تورکیا ئەنجام درا.
ڕاشیگەیاند: تەوەرێکی دیکەی سەرەکی کۆبوونەوەکان بەھێزترکردن و زیاتر پێشخستنی جموجۆڵی بازرگانی بوو.
ئەوەشی خستەڕوو کە لایەنەکانی تورکیاش بە گرنگییەوە خواستی بەھێزکردنی جموجوڵی بازرگانی و چارەسەری کێشەکانی گەشتیاران وەرگرتووە، ئەمڕۆش رێککەوتی 21ـی 06ـی 2022 شاندێکی تەکنیکی وەزارەتی بازرگانی تورکیا لە ئەنقەرە و بەرپرسانی کومەڵگەی خابوور سەردانی کومەڵگەی ئیبراھیم خەلیلیان کرد بە مەبەستی چارەسەرکردنی کێشەی ترافیک.
بەڕێوەبەرایەتی دەروازەکە ئاماژەی بەوەش دا کە دوابەدوای ئەم ھەوڵ و کۆبوونەوانە کێشەکانی دروستبوونی ترافیک بۆ گەشتیاران بەرەو چارەسەربوون دەڕوات و ئەنجامی باش و ئەرێنی دەبێت، ھەروەھا بۆ خزمەتکردنی گەشتیاران و زیاتر پێشخستنی جموجۆڵی بازرگانی ھەوڵ و کۆبوونەوەکان لەگەڵ لایەنەکانی تورکیا بەردەوام دەبن.
کۆمێنت (0)
تا ئێستا هیچ کۆمێنتێک نەکراوە.