وەزارەتی پەروەردە: حکوومەتی فیدراڵ جارێکی دیکە ھەرێمی کوردستانى لە مافێکی بنەڕەتی بێبەش کرد

وەزارەتی پەروەردەی ھەرێمی کوردستان ڕاگەیەنراوێکی بڵاوکردووەتەوە و سەبارەت بە دانانی بەردی بنەغای ھەزار قوتابخانە لە پارێزگاکانی عێراق، لەمبارەیەوە ڕایگەیاند، جێگەی داخە کە ھەرێمی کوردستان لەم مافە بنەڕەتییەی بێبەش کراوە.

لە ڕاگەیەنراوێکدا وەزارەتی پەروەردە ھەرێمی کوردستان ڕایگەیاند: ئەمڕۆ شەممە 18ـی 06ـی 2022 سەرۆک وەزیرانی حکوومەتی فیدراڵی عێراق بەردی بناغەی هەزار قوتابخانەی نوێی لە چوارچێوەی رێککەوتنامەی عێراقی - چینی دانا.

ڕاشیگەیاند: ئێمە لە وەزارەتی پەروەردەی حکوومەتی هەرێمی کوردستان پیرۆزبایی لەو پارێزگایانە دەکەین کە لە چوارچێوەی هەرێم رێکنەخراون و ڕامان وایە شیاوی ژینگەیەکی پەروەردەیی باشن، بەڵام ئەوەی جێگەی داخە بێبەشکردنی پشکی هەرێمی کوردستانە کە 150 قوتابخانەیە  و بە نوسراومان ژمارە 374 لە 23ـی 11ـی 2020 ئاراستەی وەزارەتی پەروەردەی عێراقی فیدڕاڵمان کردووە.

ئەوەشی خستەڕوو کە پارێزگارەکانی کوردستان لە سەردانی شاندی عێراقی بۆ چین ئامادەبوون و ئەو رێککەوتننامەیە بۆ هەموو عێراق و عێراقییەکانە، لەدوای هاتنی تیرۆریستانی داعش لە 2014ـەوە، زۆرێک لە دانیشتووانی ناوچە داگیرکراوەکان ڕوویان کردە پارێزگاکانی هەرێمی کوردستان، ئێستا زیاتر لە 180 هەزار قوتابی ئاوارەی ناوخۆیی لە هەرێمی کوردستان دەخوێنن و بەشێکی زۆری قوتابخانەکانی هەرێمی کوردستانمان بۆ تەرخانکردوون، بەجۆرێک قوتابخانەی یەک دەوامیمان بووەتە دوو دەوامی و دوو دەوامی بۆتە سێ دەوامی بەهۆی ئەو تەرخانکردنەوە کە ئێمە وەک ئەرکێکی نیشتیمانی و مرۆڤایەتی لێی دەڕوانین.

ئاماژەی بەوەش داوەکە تەنانەت داوای 10q ملیار دیناری عێراقیمان کردووە بۆ نۆژەنکردنەوەی ئەو قوتابخانانە و حکوومەتی عێراقی فیدڕاڵ ڕەتی کردووەتەوە.

وەزارەتی پەروەردە دووپاتی کردۆتەوە کە "دووبارە پیرۆزبایی لە گەلانی عێراق  دەکەین و وێڕای بێبەشکردنمان، ئێمە لە وەزارەتی پەروەردەی هەرێمی کوردستان، بەردەوام دەبین لەسەر پێکەوەژیان و خزمەتکردنی قوتابییانی ئاوارەی ناوخۆ، لە هەمان کاتیشدا نیگەرانی و ناڕازیبوونمان  دەردەبڕین لەبەرامبەر بێبەشکردنی خەڵکی کوردستان.

وەزارەتەکە دەشڵێت، داوا لە حکوومەتی عێراقی فیدراڵ دەکەین، پەروەردە وەک مافێکی بنەڕەتی هەموو عێراقییەکان ببینێت بێ جیاوازی و پشکی هەرێمی کوردستان بڕیاری لێ بدرێت، بە پێچەوانەوە، بێبەشکردنی هاووڵاتییانی هەرێمەکەمان بەهەموو پێکهاتەکانییەوە، مانای وایە حکوومەتی عێراقی فیدڕاڵ، سیاسەتی گەشەپێدانی هاوسەنگ، ناگرێتەبەر بۆ هەموو عێراقییەکان.