ئەمڕۆ سێشەمە 2022.4.5، بەسەرپەرشتی ئومێد خۆشناو، پارێزگاری هەولێر، بەئامادەبوونی هێمن قادر جێگری پارێزگار و نەبەز عەبدالحمید، قائیمقامی ناوەند و عەمید دیدار عومەر قادر، بەڕێوەبەری پۆلیسی هاتووچۆی هەولێر و عەمید خالید، بەرێوەبەری كاروباری ناوخۆ و ژمارەیەك لەئەفسەرانی بەڕێوەبەرایەتی هاتووچۆی هەولێر، لەدیوانی پارێزگا، كۆبوونەوەیە سەبارەت بەڕێگریكردن لە سەرپێچی و زێدەڕۆییەكان لە ڕێنمایی و یاساكانی هاتووچۆ ئەنجامدرا.
لەسەرەتایی كۆبوونەوەكەدا، پارێزگاری هەولێر، دەستخۆشی لە بەڕێوەبەری پۆلیسی هاتووچۆی هەولێر و ئەفسەر و پۆلیس و كارمەندانی سنووری بەڕێوەبەرایەتیەكانیان كرد كە ئەرك و كارەكانیان بەڕێك و پێكی ئەنجامدەدەن، دواتر باس لە پەرەپێدان و باشتركردنی سیستەمی هاتووچۆی ناو شاری هەولێر بەشێوەیەكی گشتی كرا و تیشك خرایە ئەو سەرپێچی و زێدەڕۆییانەی كە لەلایەن شۆفێرانەوە ئەنجامدەدرێت و دەبنە هۆی ڕووداوی نەخوازراو كارەساتی لێدەكەوێتەوە.
لەوبارەیەشەوە بڕیار لەبارەی دەستپێكردنی هەڵمەتێكی بەردەوام درا لە ڕێگەی تیمەكانی پۆلیسی هاتووچۆی هەولێر لەسەرجەم شەقام و شوێنەكانی سنووری پارێزگای هەولێر بۆ ئیجرائات وەرگرتن لەگەڵ هەموو ئەو كەسانەی لە نێو ئۆتۆمبێل مۆبایل بەكاردەهێنن، یان بەسەرخۆشی و بە ژمارەی ساختە ئۆتۆمبێل لێدەخۆڕن، هەروەها دەست بەسەر هەموو ئەو ئۆتۆمبێلانەش بگیرێت كە دەستكاری گزۆزی ئۆتۆمبێلەكانیان یان ماتۆڕسكیلیان كردووە و ئەوانەشی كە دوكەڵی ڕەش و ژەهراوی دەردەكەن، ئەوە جگە لە گرتنەبەری ڕێكاری یاسایی و تۆماركردنی سكاڵایی یاسایی بەرامبەر ئەوكەسانەی كە گرتەی ڤیدیۆیی خۆیان لەكاتی لێخورین دەگرن و لە تۆڕەكۆمەلایەتیەكان و سۆشیال میدیا بڵاوی دەكەنەوە.
هەروەها پارێزگاری هەولێر بڕیاریدا قائیمقامیەت و لیژنەكانیان سەرجەم ئەو شوێنانەی جوانكاری ئۆتۆمبێل كە (نەشرە، ژمارەی ساختە، جام ڕەش) دەكەن و سەرپێچی لەیاسا و ڕێنماییەكانی هاتوووچۆ ئەنجامدەدەن، توندترین ڕێكاری یاساییان لەبەرامبەردا بگیرێتەبەر. هەروەها بڕیاریدا، ڕێكاری پێویست لەبەرامبەر هەموو ئەو شۆفێرانەش بگیرێتەبەر كە دەبنە هۆی تێكدانی خزمەتگوزارییە گشتییەكان وەك (ترافیك، ستونی كارەبا، گادرێل، سەوزای و داری جوانكاری نێو شەقامەكان). سەرجەم ئەو بڕیار و ئیجرائاتانەش، هەموو ئوتۆمبێلێەكانی حكومی، پێشمەرگە و هێزە ئەمنیەكانیش دەگرێتەوە. بۆئەو مەبەستەش پارێزگاری هەولێر هەموو پاڵپشتیەكی خۆی بۆ بەڕێوەبەرایەتی هاتووچۆی هەولێر نیشاندا لەبەرامبەر جێبەجیكردنی بریارەكان و گرتنەبەری ڕێكارەكان.
لەكۆتایی كۆبوونەوەكەشدا، باس لەوەكرا كە دەگوترێت هۆكاری ڕووداوەكان، شەقامەكانە بەڵام بەپێی هەموو بەدواداچوون و لێكۆڵینەوەیەك دەركەوتووە كە نەخێر هۆكارەكەی شۆفێران خۆیانن، وەك نموونەش ئەوە هێنرایەوە كە شەقامی 120م هەولێر یەكێكە لەباشترین شەقامەكانی شاری هەولێر، كەچی زۆرترین ڕووداوی هاتووچۆ لەسەر ئەم شەقامە ڕوودەدات.
کۆمێنت (0)
تا ئێستا هیچ کۆمێنتێک نەکراوە.