ئەنجوومەنی سەرکردایەتی پارتی دیموکراتی کوردستان لە کەرکووک-گەرمیان ئەمڕۆ شەممە پەیامێکی بە بۆنەی 31ەین ساڵیادی ڕاپەڕینی بەهاری 1991 بڵاو کردەوە و ڕایگەیاند، ئەو ڕاپەڕینە مەزنە بووە هۆی ئەوەی گەلی کوردستان بتوانێت بەشێک لە مافە ڕەواکانی بەدەست بهێنێت و بتوانێت لە ژێر ناوی فیدڕالیەت فەرمانڕەوایی خۆی بکات.
لە ڕاگەیەنراوی ئەنجوومەنەکەدا هاتووە "ئەو ڕاپەرینە جەماوەرییەی خەڵکی خۆڕاگر و شۆڕشگێری گەلێک بوو کە هەمیشە باوەڕ و متمانەی تەواویان بە خۆیان و بە پێشمەرگە قارەمانەکان و سەرکردایەتیی سیاسیی کوردستان هەبووو بۆیە لە کاتێک کە بارودۆخی خودی و مەوزوعی لە عێراق تا ڕادەیەک هاتە کایەوە، پێشمەرگە قارەمانەکان و جەماوەر بە یەکگرتوویی هەڵمەتی ڕاپەرینیان لە (5)ی ئاداری ساڵی 1991 لە تەواوی باشووری کوردستان دەست پێ کرد بۆ ڕزگاری خاک و خەڵکی کوردستان بە کەرکووکی دڵی کوردستانیشەوە."
دەقی پەیامەکەی ئەنجوومەنی سەرکردایەتی پارتی لە کەرکووک-گەرمیان:-
پەیامی ئەنجومەنی سەرکردایەتیی کەرکووک-گەرمیان لە (31)مین ساڵیادی ڕاپەرینی بەهاری 1991
سڵاو لە گیانی پاکی بارزانیی نەمر و کاکە ئیدریسی ھەمیشە زندوو
ئەمڕۆ سی و یەک ساڵ بەسەر وەرچەرخانێکی مێژوویی لە خەبات و تێکۆشان و شۆڕش و قوربانیدانی گەلی سەربەزی کوردستاندا تێدەپەڕێت ئەویش ڕاپەرینی شکۆداری خەڵکی کوردستانە لە بەهاری 1991.
ئەو ڕاپەرینە مەزنە لە کاتێکدا بوو کە ستەم و جینۆسایدەکانی رژێمی بەعسی ڕووخاو بەرانبەر بە گەلەکەمان گەیشتە لووتکە کە تێیدا هەموو جەماوەری کوردستان بە هەموو چین و توێژەکانەوە ئامادەیی تەواویان هەبوو بۆ گیانفیداکاری لەپێناو بەرەنگاربوونەوەی رژێمی سەدامی گۆڕ بەگوڕ لەپێناو ڕزگاری و ئازادی و گەیشتن بە تەواوی مافە نیشتمانی و نەتەوایەتییەکانمان.
ئەو ڕاپەرینە جەماوەرییەی خەڵکی خۆڕاگر و شۆڕشگێری گەلێک بوو کە هەمیشە باوەڕ و متمانەی تەواویان بە خۆیان و بە پێشمەرگە قارەمانەکان و سەرکردایەتیی سیاسیی کوردستان هەبوو بۆیە لە کاتێک کە بارودۆخی خودی و مەوزوعی لە عێراق تا ڕادەیەک هاتە کایەوە، پێشمەرگە قارەمانەکان و جەماوەر بە یەکگرتوویی هەڵمەتی ڕاپەرینیان لە (5)ی ئاداری ساڵی 1991 لە تەواوی باشووری کوردستان دەست پێکرد بۆ ڕزگاری خاک و خەڵکی کوردستان بە کەرکووکی دڵی کوردستانیشەوە.
ئەو ڕاپەڕینە مەزنە بووە هۆی ئەوەی گەلی کوردستان بتوانێت بەشێک لە مافە ڕەواکانی بەدەست بهێنێت و بتوانێت لە ژێر ناوی فیدرالیەت فەرمانڕەوایی خۆی بکات.
لە کاتێکدا یادی ئەم ڕاپەرینی مەزنی خەڵکی کوردستان دەکەینەوە دەبینین هەندێک لە عەقڵیەتی دەسەڵاتداران و لایەنە سیاسییەکانی عێراق و تاقمە خیانەتکارەکەی 16-ی ئوکتۆبەری 2017 هیچ سوودیان لە ڕابردوو و ئەزموون و شۆڕش و ڕاپەڕینی خەڵکی کوردستان نەبینیوە و بە هەمان هزری شۆڤێنیی رژێمی دیکتاتۆری لەناوچوو و خولامێتیی پیلان و شەڕانگێزیی دژ بە گەلەکەمان و هەرێمی کوردستان دادەڕێژن ئەو گەلەی لەپێناو وەدیهێنانی مافە ڕەواکانی دەیان هەزاری لە ڕۆڵەکانی کردووەتە قوربانی و بەدڵنییاوە ئەو جۆرە پلان و پیلانانە بێ ئاکام و پووچەڵ دەبنەوە و گەلی سەربەرزی کوردستان دەگاتە دوا ئامانجەکانی.
لە سی و یەکەمین ساڵیادی ڕاپەرینی پڕ شکۆی کوردستاندا بە ناوی ئەنجوومەنی سەرکردایەتیی کەرکووک-گەرمیانەوە پیرۆزبایی گەرم لە جەماوەری سەربڵندی کوردستان و ڕێزدار جەنابی سەرۆک مەسعود بارزانی و پێشمەرگە قارەمانەکان دەکەین.
سەری ڕێز و نوازش بۆ گیانی پاکی شەهیدانی ڕاپەرین و گشت شەهیدانی کورد و کوردستان و شەهیدانی ئەنفال دادەنوێنین
سڵاو بۆ پێشمەرگە قارەمانەکانی کوردستان
دکتۆر کەمال کەرکووکی
سەرۆکی ئەنجوومەنی سەرکردایەتیی کەرکووک -گەرمیان
2022/3/5
کۆمێنت (0)
تا ئێستا هیچ کۆمێنتێک نەکراوە.