حكوومه‌تی هه‌رێم پڕۆژه‌یه‌كی گرنگی كاره‌با له‌ پارێزگای دهۆك جێ به‌جێ ده‌كات

پارێزگارێ دهۆکێ پێشوازیا وەزیرێ کارەبێ یێ حکۆمەتا هەرێما کوردستانێ و شاندەکێ رێکخراوێن نیڤدەولەتی کر 
ئەڤرۆ رۆژا پێنچشەمبی رێکەفتی 3ی ئادارا2022 “د.عەلی تەتەر” پارێزگارێ دهۆکێ پێشوازی ل بەرێز “کەمال محەمەد سالح” وەزیرێ کارەبێ یێ حکۆمەتا هەرێما کوردستانێ و بریکارێ رێڤەبەرێن هەردوو رێکخراوێن نیڤدەولەتی “جایکا، UNDP” کر کو ب مەرەما دیڤچوونا پرۆژێن بەرهەمئینانا کارەبێ ل سنۆرێ پارێزگەها دهۆکێ سەرەدان کربوو.
دهەڤدیتنێدا وەزیرێ کارەبێ کورتیەک ل دۆر پرۆژێن هەردوو رێکخراوان بۆ بەرهەمئینانا کارەبێ ل سنۆرێ پارێزگەها دهۆکێ بەحسکر و پاشان بەحس ل بەرنامێ کابینا نەهێ یا حکۆمەتا هەرێما کوردستانێ بۆ زێدەکرنا ژێدەرێن جودا یێن بەرهەمئینانا کارەبێ ل سنۆرێ پارێزگەها دهۆکێ کر و راگەهاند کو پرۆژێ هایدرۆپاوەرێ دێرەلۆک دقۆناغێن دوماهیێ دایە و هەروەسا پرۆژێ دوو مێگا واتی یێ بەرهەمئینانا کارەبا سۆلەر دناڤا زانکۆیا دقۆناغێن بجهئینانێدایە.
پارێزگارێ دهۆکێ سۆپاسیا سەرەدانا وەزیرێ کارەبێ یێ حکۆمەتا هەرێما کوردستانێ و هەردوو رێکخراوێن ناڤبری کر و رۆلێ وان بلند نرخاند کو ب بەرنامەکێ رێکوپێک هەول ددەن ژێدەرێن بەرهەمئینانا کارەبێ زێدەکەن و راگەهاند ژینگەها پارێزگەها دهۆکێ یا گونجایی یە کو کارەبێ ژتیشکا رۆژێ و ژێدەرێن ئاڤا رویبارابەرهەم بینیت و ئەڤ هەردوو پرۆژێن هاتینە بەحسکرن نموونێن زۆرباشن کو دشیاندایە ئەڤ جۆرە پرۆژە بهێنە بەرفرەهکرن.
پاشان هەردوو رێکخراوێن “جایکا و UNDP" کورتیەک ل دۆر کارۆپرۆژێن خۆ ل پارێزگەها دهۆکێ پێشکێشکر و سۆپاسیا هەماهەنگی و هەڤکاریا دامودەزگەهێن پارێزگەها دهۆکێ کر و دیارکر کو دێ ل سەر ئەنجامدانا ڤان پرۆژان ب هەڤپشکی دگەل حکومەتا هەرێما کوردستانێ و کارگێریا خۆجهی دبەردەوامبن.
لدویڤ بەرنامێ کابینا نەهێ یا حکۆمەتا هەرێما کوردستانێ کاردکەن بۆ بەرهەمئینانا ژێدەرێن جودایێن کارەبێ  لبەرە 200مێگا واتێن کارەبا سۆلەر پاوەر و 300 مێگا واتێن کارەبێ ژ ئاڤێ بەرهەمبینن و رێژا کارەبا هێزا پاقژ ژ 9% بکەنە 29%.