ن/ مه‌ھدی حه‌سه‌ن موراد
ئه‌ڤ جه‌ژن ئێك ژ كه‌ڤنترین جه‌ژنێن رۆژھه‌لاتا ناڤینه د كه‌فته د پێنج شه‌مبوویا ئێكێ دا ، ژ مه‌ھا سباتا رۆژھلاتێ ،سێ رۆژا به‌ری ھنگی ( دوو شه‌مبوویێ – سێ شه‌مبوویێ _ چار شه‌مبوویێ ) رۆژینه و پێنج شه‌مبوویێ دبته عیدا خدر و ئلیاس و ئه‌ڤ رۆژی خێرن نه‌فه‌رزن به‌لكی ھه‌ر ئێزدیه‌كی بڤێت رۆژیا دگرن نه‌خاسمه ئه‌ڤ كه‌سێن دایك بوونا وان ل ڤان ھه‌ر چار رۆژا بتریا وان ناڤێن ل وان دئێنه دانان خدر یان ئلیاس و بتریا ڤان كه‌سا ھه‌ر سێ رۆژا ب رۆژی دبن .
وه‌كی یه دیار ئه‌ڤ جه‌ژنا خدر وئلیاس په‌یوه‌ندی ب وه‌رزێ چاندنێ ڤه ھه‌یه پشتی چاندن خلاس دبت وتۆڤێ چاندنێ ھه‌موو دئێته ره‌شاندن و به‌لاڤكرن ل ده‌شتێ دبێژن خدر ئلیاس و ساڵ خلاس یانكو چاندن خلاس بۆ ئه‌ڤجار ل ھیڤیا به‌رھه‌مێ چاندنا خۆ د مینن ئه‌ڤ جه‌ژن دئێته گێران ،ژبه‌ركو بتریا ڤان جه‌ژن و ھه‌لكه‌فتێن مه ئێزدیان گرێدایی سروشتی و وه‌رزێن سالێ نه وه‌كی ل ڕێوره‌سمێن ڤێ جه‌ژنێ دا دئێنه گێران ،ھه‌ر وه‌سا ب جه‌ژنا مرازا ژی دئێته ناسین دباوه‌ریا مه ئێزدیان دا خدر و ئلیاس ھه‌ر سێ رۆژا ل ئاسمانی دئێنه سه‌ر ئه‌ردی د گه‌رێن و سه‌د خۆزیا وێ ده‌ڤه‌را خدر و ئلیاس تێرا ده‌رباس بن و ھه‌ر كه‌سێ لێ ڕاست بن یان بێنه مالا وان دێ ب مرازا خۆ شادبت له‌وا ل ھێڤارا عیدێ ھه‌ر ماله‌ك سێنیكه‌كا پێخوونێ به‌رھه‌ڤ دكه‌ن و دادنێنه سه‌ر جیه‌كی بلند ل مالێ دبێژن خدر و ئلیاس ھه‌گه‌ر ھاتن وێ مالێ دێ تامكه‌نه پێخوونێ و جیێن ده‌ستێن وان دێ لسه‌ر پێخوونێ دیار بن و ھه‌گه‌ر ھاتن وێ مالێ دێ خێر و بێر كه‌فتا ناڤ مالێ ورزق و مالێ وان دێ زێده‌بت ، و ھه‌ر ل ڤێ ھێڤارا جه‌ژنێ كچ یان كوڕ ھه‌گه‌ر د خه‌وا خۆدا بچته مالا خۆشتڤیا خۆ و ئاڤه‌كێ ل مالا وان ڤه‌خۆت سه‌د ل سه‌دێ دێ رزقێ وی ل وێ مالێ و دگه‌ل وێ كچێ ڤه‌بت ، به‌لكی نه ھه‌ر بۆ رزقی و ھه‌ڤژینیێ بتنێ ھه‌ر مرازه‌كا ھه‌بت ھه‌گه‌ر د خه‌وا خۆدا نه‌بی خدر و ئلیاس ببینن دێ گه‌ھن مرازا خۆ .
ئێزدی رێز و حورمه‌ته‌كا مه‌زن د ده‌نه كه‌سایه‌تی یا خدر و ئلیاس و ب نه‌مر دزانن ، دیسا د باوه‌ریا مه ئێزدیان دا ب خوداوه‌ندێ ده‌ریا و رۆباران دزانن ،مه‌زارگه‌ھێن وی ژی ل ده‌ڤه‌رێن ئێزدیان دروست كرنه ، مینا باعه‌درێ ، گوندێ كه‌رسافا ل كۆمه‌لگه‌ھا شێخكا ، قه‌زا شێخان ، وھتد ھه‌روه‌سا مه‌زارگه‌ھێ وی ل حه‌له‌بێ ژی ھه‌یه ، مێژونڤیس وه‌سا باوه‌ر دكن ئه‌ڤ مه‌زار به‌ری ئیسلامێ ب سه‌دان سالان ھه‌بوویه نھۆ ژی ئیسلام ب تایبه‌ت شیعه ڕێوره‌سمێن تایبه‌ت ھه‌نه وجه‌ژنه‌كا به‌رفره‌ھ دگێرن بۆ خدر و ئلیاس ھه‌روه‌سا مه‌سیحیه‌ت ژی و یه‌ھودیا رێوره‌سمێن تایبه‌ت ھه‌نه، ئه‌ڤ تایبه‌تمه‌ندیا ڤان ئۆلا دایه خدر و ئلیاس ئێك ئۆل نكارت بێژت ئه‌ڤه پێگه‌ھێ ئۆلا مه یه له‌وما دئێزدیاتیێ دا ھه‌گه‌ر ئه‌م به‌رێ خۆ ب ده‌ینێ وه‌ك مێتولۆژی تێگه‌ھه‌ك گه‌له‌ك پیرۆز دایه خدر وئلیاس وه‌ك دوو مه‌لایكه‌ت وه‌ك دوو ده‌روێش وه‌ك دوو كه‌سێن چاك وه‌ك دوویێن زێندی ھه‌تا نھۆ دساخ داینه ناسین ، ھه‌ر وه‌سا ناڤێ خدر و ئلیاس د گه‌له‌ك قه‌ول و به‌یتا دا ھاتیه نه‌خاسمه ل قه‌ولێ پیر شه‌ره‌ف :
شه‌ره‌ف ده‌نگ دكه ژ ئه‌ساسه
فه‌ھمێن زۆر قیاسه
تو خدری یان ئلیاس
دڤێ جه‌ژنێ دا
١- سه‌ربڕ نائێنه سه‌رژێكرن
٢- نابت ژ مال دووربكه‌ڤن وبچنه رێ و رێباریێن دوور.
٣- ل رۆژێن رۆژیا و رۆژا جه‌ژنێ نێچیر قه‌ده‌غه‌یه.
٤- گه‌نمی د قه‌لینن، دبێژنێ قه‌لاتك ، ئه‌ڤه ژی نیشانا ب داوی ھاتنا وه‌رزێ چاندنێیه.
٥- رۆژا چارشه‌مبوویێ قه‌لاتكا د ھێرن و ( پێخوونێ) چێدكن.
٦- رۆژا جه‌ژنێ جۆتیار ھنده‌ك پێخوونێ دبه‌ته ناڤ زه‌ڤیێن خۆ یێن چاندنێ و لێ دڕه‌شینت، بۆ خێر و به‌ركه‌تێ.
٧- ساڤارێن ھێرای دقه‌لینن و دكه‌نه زادێ جه‌ژنێ ، دبێژنێ((چه‌رخووس ))..
كوردستان تیڤی/ كامران
کۆمێنت (0)
تا ئێستا هیچ کۆمێنتێک نەکراوە.