نەتەوە یەكگرتووەكان داوای پاراستنی منداڵانی ئۆكراینا دەكات

ڤیرجینیا گامبا، نوێنەری تایبەتی سكرتێری گشتی نەتەوە یەكگرتووەكان بۆ پاراستنی منداڵان لە پێكدادانی چەكداری، لەگەڵ نوێنەری بابەتەكانی توندوتیژی دژی منداڵ، نەجات مەعالا مەجید، راگەیەندراوێكی هاوبەشیان بڵاوكردەوە.
لە راگەیەندراوەكەدا هاتووە: "ئەوە وەبیردەهێنینەوە كە پێویستە هەموو لایەنە بەشەڕهاتووەكانی ئۆكراینا هاووڵاتییانی مەدەنی بەگشتی و حەوت ملیۆن و نیو منداڵی ئەو وڵاتە، بپارێزن".
هەروەها جەخت لەوەش كراوەتەوە كە پێویستە لە كاتی بەردەوامی شەڕی ئۆكراینادا بنەماكانی مافی مرۆڤ بپارێزرێن و رووی چەك نەكرێتە منداڵان، بەتایبەتی هەموو لایەنەكان دووربكەونەوە لە هێرش كردنە سەر قوتابخانە، نەخۆشخانە و ژێرخانە مەدەنییەكان.