وه‌زیری سه‌رچاوه ئاوییه‌كانی عێراق ئاشكرای كرد، ئێران ڕێڕه‌وی زیاتر 20 ڕووباری گۆڕیوه كه ده‌ڕژانه ناو خاكی عێراقه‌وه و ئه‌مه‌ش پێشێلكاریی ڕێككه‌وتنه نێوده‌وڵه‌تییه‌كانه.
مه‌هدی ئه‌لحه‌مه‌دانی وه‌زیری سه‌رچاوه ئاوییه‌كانی عێراق له كۆنگره‌یه‌كی ڕۆژنامه‌وانیدا له پارێزگای میسان ڕایگه‌یاند: ئێران ڕێڕه‌وی ئه‌و ڕووبارانه‌ی گۆڕیوه و ئه‌مه‌ش پێشێلكارییه‌كی نێوده‌وڵه‌تییه، ئه‌م ڕووبارانه سه‌تان ساڵه له‌نێوان هه‌ردوو وڵات تێده‌په‌ڕن و نابێت هیچ په‌یوه‌ندییه‌كی به ململانێ و كێشه‌كانی وڵاتانه‌وه هه‌بێت.
وه‌زیری سه‌رچاوه ئاوییه‌كان جه‌ختی كرده‌وه كه به‌هۆی گۆڕینی ڕێڕه‌وی ڕووباره‌كان دیمۆگرافیای عێراق گۆڕاوه و به‌تایبه‌تیش له پارێزگاكانی دیاله و واسیت و میسان و به‌سڕه به‌هۆی كه‌مبوونی ئاوه‌وه كاریگه‌ری گه‌وره له‌سه‌ر زه‌ڵكاوه‌كان و شه‌تولعه‌ره‌ب دروست بووه.
جێی باسه وه‌زاره‌تی سه‌رچاوه ئاوییه‌كان به‌هۆی كه‌می ئاو و وشكه‌ساڵییه‌وه بڕیاری دابوو بۆ ئه‌مساڵ ته‌نیا 50%ی خاكی كشتوكاڵی له عێراق به‌كاربهێنرێ و هه‌روه‌ها زۆرینه‌ی ئه‌و به‌رهه‌مانه‌ی ئاوییان زۆر ده‌وێت قه‌ده‌غه‌ی چاندنی ڕاگه‌یاندبوو.
کۆمێنت (0)
تا ئێستا هیچ کۆمێنتێک نەکراوە.