كه‌ناڵێكی ته‌له‌ڤزیۆنی ئه‌رژه‌نتینی ده‌ستی به په‌خشكردنی زنجیره درامایه‌ك كرد كه تایبه‌ته به ژیانی دیێگۆ ئه‌رماندۆ مارادۆنا ئه‌فسانه‌ی تۆپی پێی ئه‌رژه‌نتین.
ئه‌ویش دوای كه‌متر له ساڵێك له كۆچی دوایی ئه‌م ئه‌ستێره‌یه‌ی یاریگاكانی تۆپی پێ، به‌ر له ده‌ستپێكردنی ئه‌ڵقه‌كانی زنجیره دراماكه‌ش، نمایشێكی تایبه‌ت بۆ ئه‌م كاره هونه‌ریه له یاریگای ئه‌رجه‌نتینیۆس جونیۆرز پێشكه‌شكرا كه مارادۆنا له‌م یاریگایه‌و له ناوه‌ڕاستی حه‌فتاكانی سه‌ده‌ی ڕابردوو ده‌ستی به یاری تۆپی پێ كردووه.
زنجیره دراماكه به ناونیشانی، مارادۆنا خه‌ونێكی پیرۆزه كه له ساڵی دووهه‌زارونۆزده له لایه‌ن كۆمپانیای ئه‌مازۆن پرایم ڤیدیۆ ده‌ست به به‌رهه‌مهێنان و وێنه‌گرتنی كراوه‌و له ئێستاوه له دووسه‌دوچل وڵاتی جیهان په‌خش ده‌كرێت، ناوه‌ڕۆكی زنجیره دراماكه پتر باسی كاروانی وه‌رزشی مارادۆنا ده‌كات و زۆر به كه‌می ژیانی تایبه‌تی ئه‌فسانه‌كه ده‌خاته‌ڕوو، مارادۆنا به‌ر له كۆچی دوایی كردنی، خۆی ئاگاداری ئه‌م كاره هونه‌ریه بوو و هه‌ر خۆشی له‌گه‌ڵ كۆمپانیای به‌رهه‌مهێنه‌ر له‌سه‌ر ناوه‌ڕۆك و ورده‌كاریه‌كانی زنجیره دراماكه ڕێككه‌وتووه.
مارادۆنا له بیست وپێنجی تشرینی دووه‌می پاساڵ له شوێنی نیشته‌جێبوونی خۆی له ئه‌رژه‌نتین و به‌هۆی جه‌ڵته‌ی دڵ له ته‌مه‌نی شه‌ست ساڵی كۆچی دوایی كرد.
کۆمێنت (0)
تا ئێستا هیچ کۆمێنتێک نەکراوە.