لی جای میۆنگ، سەرۆکی کۆریای باشوور، ئەمڕۆ هەینی بە فەرمی ڕایگەیاند، سیئۆل هیچ جۆرە هێزێکی سەربازی بۆ گەرووی هورمز یان بەشداریکردن لە جەنگی نێوان ئەمریکا و ئێران ڕەوانە ناکات.
سەرۆکی کۆریای باشوور لە کۆنفرانسێکی ڕۆژنامەوانی لە کۆشکی شینی سەرۆکایەتی لە سیئۆل، وەڵامی ئەو ڕاپۆرتانەی دایەوە کە باس لەوە دەکەن وڵاتەکەی بیر لە ناردنی هێز بۆ گەرووی هورمز دەکاتەوە. لی جای میۆنگ بە ڕاشکاوی گوتی: هیچ جۆرە تێوەگلان یان دەستوەردانێک لە جەنگدا نابێت. ئێمە هیچ هێز یان کەرەستەیەکی سەربازی بۆ ئەو مەبەستە بڵاو ناکەینەوە.
ناوبراو جەختی کردەوە کە ئەم بنەمایە تا ئێستا پارێزراوە و لە داهاتووشدا بە نەگۆڕی دەمێنێتەوە. سەرۆکی کۆریای باشوور ئاماژەی بەوە کرد کە وەک هەر وڵاتێکی دیکە، ئەوان تەنیا کەمترین چالاکیی پێویست ئەنجام دەدەن بۆ پاراستنی کەشتییە بازرگانییەکان و ڕێڕەوەکانی گواستنەوەی نەوتی وڵاتەکەیان، هەروەها دڵنیابوون لە سەلامەتیی گیانی هاووڵاتییانیان لە ناوچەکەدا.
لی جای میۆنگ بۆ ڕوونکردنەوەی زیاتر گوتی: هەندێک کەس نیگەرانن کە ئەمە ببێتە هۆی ناردنی هێزی شەڕکەر یان ئەوەی سەربازانی ئێمە بخرێنە ژێر فەرماندەیی هێزە بیانییەکان و تووشی مەترسی ببن، بەڵام جارێکی دیکە بە ڕاشکاوی و بە ڕوونی دەیڵێمەوە: هیچ جۆرە هێزێک بۆ گۆڕەپانی جەنگ ڕەوانە ناکەین.
ئەم بڕیارەی سیئۆل وەک هەوڵێک دەبینرێت بۆ مانەوە لە دەرەوەی گرژییە سەربازییە توندەکانی نێوان تاران و واشنتۆن، لە کاتێکدا کۆریای باشوور کڕیارێکی سەرەکیی وزەی ناوچەکەیە و دەیەوێت پەیوەندییە بازرگانییەکانی لەگەڵ هەموو لایەنەکان بە پارێزراوی بهێڵێتەوە.
کۆمێنت (0)
تا ئێستا هیچ کۆمێنتێک نەکراوە.