سەرۆکی هەرێمی کوردستان له میانهی دیدارێكیدا لهگهڵ باڵیۆزی تازەی سوید لە عێراق هەموو ئامادەییەکی هەرێمی کوردستانی بۆ پێشوازی لە وەبەرهێنانی سویدی دەربڕی، هەروەها پوختەیەکی دەربارەی یاسای هەڵبژاردن لە عیراق و پرۆسەی دەنگدان و ئەنجامەکانی خستە ڕوو.
پێشنیوەڕۆی ئەمڕۆ پێنجشەممە 2021/10/21 نێچیرڤان بارزانی، سەرۆکی هەرێمی کوردستان، پێشوازی لە یۆناس لۆڤێن، باڵیۆزی تازەی سوید لە عیراق کرد.
لە دیدارێکدا نێچیرڤان بارزانی پیرۆزباییی دەستبەکاربوونی لە باڵیۆز کرد، هیوای سەرکەوتنی بۆ خواست و هەموو پشتگیرییەکی بۆ سەرکەوتنی ئەرکەکەی دووپات کردەوە، هەروەها ستایشی یارمەتییەكانی سویدی بۆ هەرێمی كوردستان كرد.
لای خۆیەوە باڵیۆزی سوید باسی لە بایەخدانی وڵاتەكە بە پەیوەندییەكانی لەگەڵ عیراق و هەرێمی كوردستان لە هەموو بوارەكاندا کرد بەتایبەتیش هاندانی كۆمپانیا سویدییەكان بۆ وەبەرهێنان لە عیراق و هەرێمی كوردستان.
نێچیرڤان بارزانی هەموو ئامادەیییەکی هەرێمی کوردستانی بۆ پێشوازی لە وەبەرهێنانی سویدی دەربڕی، هەروەها پوختەیەکی دەربارەی یاسای هەڵبژاردن لە عیراق و پرۆسەی دەنگدان و ئەنجامەکانی خستە ڕوو. لەمبارەیەوە سوپاسی هاریکاریی یوونامی، یەكێتیی ئەورووپا و هاوبەشە نێودەوڵەتییەكانی لەگەڵ كۆمسیۆنی باڵای هەڵبژاردنی عیراقدا کرد.
برەودان بە پەیوەندییەکان، تاوتوێکردنی دۆخی ناوچەکە بەگشتی، كاریگەرییەكانی گۆڕانی كەشوهەوا بەتایبەتی لەسەر عیراق، كار و چالاكییەكانی نوێنەرایەتیی حكوومەتی هەرێم و ڕەوەندی كوردستانی لە سوید، تەوەرێکی دیکەی دیدارەکە بوون.
کۆمێنت (0)
تا ئێستا هیچ کۆمێنتێک نەکراوە.