له‌ بۆندس لیگادا کۆڵن سه‌رکه‌وتنی به‌سه‌ر گرۆیته‌ر فۆرت تۆمارکرد

له‌ ده‌ست پێكی گه‌ری حه‌وته‌می خولی بۆندس لیگای ئه‌لمانی یانه‌ی كۆلن له‌سه‌ر یاریگای خۆی روبه‌رووی یانه‌ی گرۆیته‌ر فۆرتی میوانی بویه‌وه‌.
 یارییه‌كه‌ له‌سه‌ر یاریگای راین ئینێرجی ستادیۆم به‌رێوه‌ چوو ، میوانه‌كان ته‌نها حه‌وت خوله‌كیان پێویست بوو تا گۆلی یه‌كه‌م له‌ رێگای یاریزانی ئه‌لمانی ماركۆ مێرهۆگر تۆمار بكه‌ن و به‌م گۆله‌ش له‌ نیوه‌ی یه‌كه‌می یاریه‌كه‌ له‌ پێش كۆلنی خاوه‌ن یاریگا بوون .
 له‌ گێمی دووه‌م ئاستی یانه‌ی كۆلن باشتر بوو له‌ خوله‌كی په‌نجا سباستیان ئیندرسۆنی سویدی گۆلێكی تۆمار كردو ئه‌نجامی یاریه‌كه‌ی یه‌كسان كرده‌وه‌ .
 پێنج خوله‌ك دواتر ئیلیاس ئه‌لسخێری تونسی و یاریزانی كۆلن گۆلی دوه‌می تۆمار كردو خاوه‌ن یاریگای له‌یاریه‌كه‌ پێشخست .
 له‌ خوله‌كی كۆتایش هه‌مان یاریزان ئیلیاس ئه‌لسخێری گۆلی دووه‌می خۆی و سێیه‌می یانه‌كه‌ی تۆمار كردو یاریش به‌ سێ گۆل به‌رامبه‌ر به‌ گۆلێك له‌ سوودی كۆلن كۆتایی پێ هات و یانه‌كه‌ سێیه‌م بردنه‌وه‌ی له‌م وه‌رزه‌ی خوله‌كه‌ی به‌ده‌ست هێناو بووه‌ خاوه‌نی دوازده‌ خال و  به‌شێوه‌یه‌كی كاتی سه‌ركه‌وت بۆ پله‌ی شه‌شه‌می ریزبه‌ندی و یانه‌ی گرۆیته‌ر فۆرتیش تووشی شه‌شه‌م دۆراندن هات و به‌ ته‌نها خالێك له‌ پله‌ی هه‌ژده‌هه‌مین و كۆتایی ریزبه‌ندی دێت .