وه‌زاره‌تی ژینگه‌ی عێراق ئاشكرای كرد، نزیكه‌ی 13 ملیۆن ته‌ن له مین و ته‌قه‌مه‌نی له به‌ری لای ڕاستی شاری مووسڵ هه‌یه و بڕیاریانداوه به‌شێكیان به ڕێگه‌ی كیمیاوی و تیشكه‌وه له‌ناو ببه‌ن.
جاسم فه‌لاحی به‌رپرسی كارگێڕی وه‌زاره‌تی ژینگه ڕوونی كرده‌وه: له هه‌وڵه‌كانیان بۆ پووچه‌ڵكردنه‌وه‌ی مین و هه‌ڵگرتنه‌وه‌ی پاشماوه‌كانی جه‌نگ له پارێزگای نه‌ینه‌وا به‌رده‌وامه ئه‌و پارێزگایه‌ی زه‌ره‌رمه‌ندی یه‌كه‌می شه‌ڕی تیرۆر و چه‌كدارانی داعش بوو.
به‌رپرسی كارگێڕی وه‌زاره‌تی ژینگه جه‌ختیشی كرده‌وه كه تا ئێستا نزیكه‌ی 13 ملیۆن ته‌ن له مین و ته‌قه‌مه‌نی ته‌نیا له به‌ری لای ڕاستی شاری مووسڵ ماوه.
فه‌لاحی ڕاشیگه‌یاند كه له‌گه‌ڵ نه‌جم ئه‌لجبووری پارێزگاری نه‌ینه‌وا گفتوگۆیان له‌سه‌ر بابه‌تی پووچه‌ڵكردنه‌وه‌ی مین و ته‌قه‌مه‌نییه‌كانی شاری مووسڵ كردووه له‌گه‌ڵ ئه‌و گیروگرفتانه‌ی دێته به‌رده‌میان له ئه‌نجامدانی كاره‌كانیان.
به‌رپرسه كارگێڕییه‌كه‌ی وه‌زاره‌تی ژینگه ئاماژه‌ی به‌وه‌دا كه له‌گه‌ڵ پارێزگار باسییان له‌و كردووه و پلانیان داڕشتووه به‌شێك له مین و ته‌قه‌مه‌نییه‌كان به‌ڕێگه‌ی كیمیاوی و تیشك له‌ناو ببه‌ن.
کۆمێنت (0)
تا ئێستا هیچ کۆمێنتێک نەکراوە.