ئەمڕۆ پێنجشەممە، جەعفەر ئیمینیکی ئەندامی مەکتەبی سیاسی پارتی دیموکراتی کوردستان لە مەڕاسیمێکدا بۆ ناساندنی کاندیدانی پارتی لە شەنگال گوتارێکی پێشکەش کرد و تێیدا ڕایگەیاند پارتی دەیەوێت عێراقی نوێ عێراقێکی دیموکراسی بێت.
جەعفەر ئیمینیکی لە گوتارەکەیدا گوتی، لە هەڵبژاردندا مەبەستی ئێمە بردنەوەی کورسی زیاتر و دەنگی زیاتر نییە، بەڵکوو پێویستە ئێمە سەرکەوین چونکە ئێمە خاوەن پرسێکی گرنگی نەتەوەیی و نیشتیمانین، پارتی خاوەن پرسی شەنگال و زوومارە، پێویستە دووبارە هێز و سەنگی پارتی نیشانبدرێتەوە، هەروەها گوتیشی، دەمانەوێت هەموومان لە بەغدا بەهێزبین بۆ ئەوەی عێراق لە تونێلی تاریکی ڕزگاری بێت.
جەعفەر ئیمینیکی لە درێژەی قسەکانیدا ئاماژەی بەوەشکرد، پارتی حیزبی دامەزرێنەری عێراقی نوێیە و دەیەوێت عێراقی نوێ عێراقێکی دیموکراسی بێت.
ڕاشیگەیاند، چیتر دەرفەتی تفەنگ و ئەنفالکردن نەماوە، ئێستا کاتی چەسپاندنی دیموکراسییە، هەر دەنگێک لە هەڵبژاردن ئەمانەتە، بۆیە بێ دوو دڵی بەشداری بکەن لە هەڵبژاردن.
کۆمێنت (0)
تا ئێستا هیچ کۆمێنتێک نەکراوە.