وەزارەتی کشتوکاڵ لەبارەی گرانبوونی پەینی کیمیایی راگه‌یاندراوێکی بڵاوکرده‌وه‌

وەزارەتی کشتوکاڵی هەرێمی کوردستان رایگەیاند،  بەرزبونەوەی نرخی پەینی کیمیایی، پەیوەندی هەیە بەنرخی ئەو مادانەوە لە ئاستی جیهان کە وەکو هەر بەرهەمێکی دیکەی هاوردەکراو گۆڕانی بەسەرداهاتووە و گرانبووە، هەروەها دابەزینی بەهای دیناری عێراقی بەرامبەر دۆلار هۆکارێکی تری ناوخۆییە کە کاریگەری خستۆتە سەر گرانبوونی نرخی پەین، بۆیە لەئێستادا کار لەسەر بەرنامەیەکی هەماهەنگی پەرەپێدان و پاڵپشتی جوتیاران دەکەن بەهاوکاری کەرتی تایبەت و رێکخراوە نێودەوڵەتییەکان.
وەزارەتی کشتوکاڵ لە راگه‌یاندراوێكدا،  وەڵامی عەبدولستار مەجید، ئەندامی پەرلەمانی کوردستانی داوەتەوە لەبارەی گرانبوونی پەینی کیمیایی و باسی لەوەکردوە، گرانبوونی نرخی پەینی کیمیاوی لە ئاستی جیهاندا وەکو هەر بەرهەمێکی تری هاوردەکراو گۆڕانی بەسەرداهاتووە و گرانبووە، بە بەراورد بەساڵانی پێشوو، کە ئەمەش دەگەرێتەوە بۆ  گۆڕانکاریەکان و کێشەی بەرهەمهێنانی کۆمپانیا گەورەکانی بواری بەرهەمهێنانی پەین و بەرزبونەوەی نرخی دۆلار  بەرامبەر بەدینار و بەربڵاوبونی پەتایی کۆرۆنا و بەرزبونەوەی بۆرسەی پەین، کە بەڕێژەی ( %30 )  کاریگەری راستەوخۆی خستۆتە سەر گرانبوونی تێچوونی نرخی بەرهەمهێنان و هاوردەکردنی پەین بۆ هەرێمی کوردستان.
 راشیده‌گه‌ێنێت، سەبارەت بە دەنگۆی دانانی باجێکی زۆر لەسەر پەینی کیمیایی لەلایەن حکومەتی هەرێمی کوردستان، لەلایەن وەزارەتی کشتوکاڵ و سەرچاوەکانی ئاو هیچ جۆرە باجێک لەسەر هاوردەکردنی پەین وەرناگیرێت ، بەڵکو بەپێچەوانەوە هەنگاوی گرنگ و نراوە بۆ هەماهەنگی لەگەڵ لایەنە پەیوەندی دارەکان و داواکراوە  لە سەرۆکایەتی ئەنجومەنی وەزیران بۆ مەبەستی لێخۆشبوونی گومرگی و ئاسانکاری بۆ هاوردەکردنی پەین لەدەرەوە.
وەزارەتی کشتوکاڵ ئاماژه‌ بۆ ئه‌وه‌شده‌كات: سەبارەت بە قۆرخکاری بۆ چەند کۆمپانیایەک بۆ هاوردەکردنی پەین، بەهیچ جۆرێک لەلایەن وەزارەتی کشتوکاڵ و سەرچاوەکانی ئاو قۆرخکاری بۆ هیچ کۆمپانیایەک نەکراوە ،بەڵکو لەم کابینەی لە لایەن وەزارەتی کشتوکاڵ و سەرچاوەکانی ئاو بڕیاردراوە بەشێوازێکی ئازادانە کۆمپانیاکان دەتوانن مۆڵەتی فەرمی وەربگرن و پەین هاوردە بکەن ،چونکە وەزارەتمان دژی هەموو جۆرە قۆرخکاریەکە  و ڕێگەی بەم دیاردەیە نەداوە.
ئەوەش خراوەتەڕوو، لەکابینەی نۆیەمی حکومەتی هەرێمی کوردستان ،وەزارەتی کشتوکاڵ و سەرچاوەکانی ئاو بەهۆی  قەیرانی داریی و نەبوونی بودجەی پاڵپشتی کراوی (اعاناتی زراعی) و بەردەوام نەبوونی قەرزی کشتوکاڵی لە بانقەکان نەتوانراوە هاوشێوەی ساڵانی پێشوو بڕێک لەو هاوکاریانە وەکو دابینکردنی پەینی کیمیاوی بۆ جوتیاران دابین و دابەش بکات، بۆیە لە ئێستادا وەزارەتی کشتوکاڵ و سەرچاوەکانی ئاو کار لەسەر بەرنامەیەکی هەماهەنگی پەرەپێدان و پاڵپشتی جوتیاران دەکات لەگەڵ سەرۆکایەتی ئەنجومەنی وەزیران و حکومەتی فیدراڵ و رێکخراوە نێودەوڵەتیەکان و بەشداری پێکردنی کەرتی تایبەت.