پەیاما کەسوکارێن قوربانیێن فەرمانا شنگالێ ل 3ی تەباخا 2021

ب دەستووری خودێ مەزن و دلۆڤان
نامەیەکا ڤەکری بۆ رایێ گشتی یێ کوردستانی و عیراقی و ناڤدەولەتی.
ئەڤرۆ ٣ی تەباخێ وەکو رۆژەکا رەش دهێتە ناساندن لناڤا تەڤایا گەلێ کوردستانێ و شنگالا خۆراگر بتایبەت ژبەر کو ل رۆژەکا وەکو ئەڤرۆدا ل (٣ی تەباخا ٢٠١٤)ێ باژێرێ شنگالێ بنگەهێ ئاشتیێ و پێکڤەژیانێ کەڤتە بەر هێرشێن ڕێکخراوا تیرۆریستی یا داعش و بهەزاران ژن و زارۆک و پیر و کال بوونە قوربانی وهەروەها بهەزاران کچ و ژن کەفتنە دەستێ وان هۆڤ و نەمەردان و هەتا نهۆ ژی گەلەک ژوان بێ سەروشوێن و نەدیارن و هەروەها ب سەدان گۆڕێن بکۆم ژ خەلکێ مەیێ سڤیل هاتن دروستکرن و زێدەباری ڤێ ژی مالێ و ملکێ خەلکەکی بێ گونەهـ تالانکرن.
ئەم ئەڤرۆ وەک کەسوکارێن قوربانییان پشتی هەفت سالێن دەربەدەریێ و بۆراندنا ژیارا دناڤ خیڤەتگەهان دە ڤێ رۆژا رەش ل بیرا خۆ دئینن و دوژمنێ مرۆڤایەتیێ رسوا و شەرمەزار دکەین و هەر بڤێ هەلگەڤتا دلتەزین دەنگی خۆ دگەهینینە هەموو مرۆڤ دۆست و ئاشتیخواز و رێکخراوێن مافێ مرۆڤان و نەتەوەیێن ئێکگرتی و پەرلەمان و حکوومەتا عیراقا فیدرال و حکوومەت و پەرلەمانێ هەرێما کوردستانێ و داخوازێ ژ وان دکەین ئەڤان خالێن ل خوارێ دیار خواستەکێن خەلکێ مەنە لبەر چاڤبگرن:
١ـ ئەو فەرمانا بسەرێ خەلکێ مە یێ ئێزدی ل شنگالێ هاتی وەک جینۆساید بێتە ناساندن.
٢ــ هەموو هەول و بزاڤ بکەڤنە کار ژبۆ ڤەگەراندنا ئەوان کچ و ژنێن  هەتا نهۆ مایین ددەستێن تیرۆریستان دە.
٣ــ داخوازێ دکەین هەموو رزگاربوویێن دەستێ داعش بێنە هژمارتن وەک زیندانیێن سیاسی وهەروەها قوربانیێن فەرمانێ وەکو شەهید بێنە ناساندن.
٤ــ رێککەڤتنا دناڤبەرا هەولێر و بەغدا هاتیە ل دارخستن بزووترین دەم بێتە جیبەجیکرن داکو ببێتە رێخۆشکەرک ژبۆ ڤەگەریانا خەلکێ بۆ سەر جیهـ و وارێن وان.
٥ــ چۆلکرنا شنگال ژ هەموو هێزێن چەکدار یێن نەشەرعی (پ.ک.ک) و (حەشدا شەعبی) نموونە.
٦ــ داخوازێ دکەین دەڤەرێن مە بێنە ئاڤەدانکرن و خزمەتگوزاری و ئارامی لێ بیتە پەیداکرن و خەلکێ مە بێتە قەرەپۆکرن و شنگال ڤەگەرێتە سەر هەرێما کوردستانێ.
٧ــ هەر کەسەکی تاوانبار و دەستێ وی بخوینا خەلکێ مە بووی بێتە دادگەهکرن و سزادان.
ل دوماهیێ ئەم شەهیدێن وێ فەرمانا مەزن ل بیرا خۆ دئینن و سەرێ ڕێزو نوازشێ بۆ وان و تەڤایا شەهیدێن کوردستانێ دچەمینن و هیڤیدارین ژ ئێزدانێ دلۆڤان ئەو کچ وژنێن مایین لناڤ دەستێن تیرۆریستان دە بێنە رزگارکرن و هەروەها خەلکێ مە بسەربلندی ڤەگەرێنە سەر جیهـ و وارێن خۆ .
دیسان فەرە ئەم وان هاریکاریێن خەلکێ کوردستانێ پێشکێشی خەلکێ مە کرین ل درێژیا هەفت سالێن دەربەدەریێ و ئاوارەبوونێ لبەر چاڤبگرین و پڕ ژدل سوپاسیا وان بکەین و هەروەها ئەم بئەرک دزانن سوپاسیێن بێ سنوور ئاراستەی جەنابێ سەرۆک و لێڤەگەرێ گەلێ کورد سەرۆک بارزانی و کاک نێچیرڤان بارزانی سەرۆکێ هەرێما کوردستانێ بکەین کو برێکا  نڤیسینگەها وی یا تایبەت بهزاران کچ و ژن وزارۆک یێن ئێزدی هاتنە رزگارکرن و سوپاسییەکا تایبەت بۆ حکوومەتا کوردستانێ کو بەردەوام خزمەتا خەلکێ مە کری.
ب هیڤیا شنگالەکا ئاڤەدان ورەوشەکا ئارام و ژیانەکا شاد و بەختەوەر.
کەسوکارێن قوربانیێن فەرمانا شنگالێ.
٢٠٢١/٨/٣ دهۆک