حکوومەتی ریاز، لە دوای زیاتر لە 40 ساڵ لە قەدەغەکردنی کرانەوەی دوکان و بازاڕەکان لە کاتی نوێژدا، مۆڵەتی بە دوکان و بازاڕەکان دا کە لە کاتەکانی نوێژدا کراوەبن.
بەگوێرەی هەواڵێکی کەناڵی ئەلئیخبارییە-ی سعوودیە، یەکێتی ژوورە بازرگانییەکانی سعوودیە لە راگەیەندراوێکدا ئەوەی خستوەتەڕوو کە لەمەودوا مۆڵەت دەدرێتە خاوەن دوکانەکان لە کاتی نوێژدا دوکانەکانیان بەکراوەیی بهێڵنەوە و سەرجەم جموجۆڵە ئابوورییەکان بەردەوامبن.
لە راگەیەندراوەکەدا باس لەوەش کراوە کە بڕیارەکە لە چوارچێوەی رێکارەکانی خۆپارێزی لە بڵاوبوونەوەی پەتای کۆرۆنا و بۆ رێگری کردن لە دروستبوونی قەرەباڵغی کە لە کاتی نوێژدا و بەهۆی داخرانی دوکانەکانەوە دروست دەبوو، دەرکراوە.
جێی وەبیرهێنانەوەیە لیژنەی "امر بالمعروف والنهی عن المنكر" لە ساڵی 1980دا بڕیاریدا لە کاتی نوێژدا سەرجەم دوکان و بازاڕەکانی سعوودیە دابخرێن و سەرجەم چالاکییە ئابوورییەکان بوەستێندرێن.
بەڵام لە ماوەی چەند ساڵی رابردوودا کۆمەڵێک گۆڕانکاری زۆر لە بوارەکانی سیاسەت، کۆمەڵایەتی و کولتووری وڵاتی سعوودیە روویداوە و بەشێکی زۆر لەو شتانە رێگەیان پێدراوە کە لە رابردوودا قەدەغەبوون.
گرنگترین ئەم گۆڕانکارییانەش مۆڵەتدانە بە ژنان بۆ لێخوڕینی ئۆتۆمبێل و چوونیان بۆ یاریگاکان کە لە رابردوودا تەنها پیاوان ئەم مافەیان هەبوو.
کۆمێنت (0)
تا ئێستا هیچ کۆمێنتێک نەکراوە.