سێزده‌ی ئابی مانگی داهاتوو ده‌ستپێکی به‌رێوه‌چوونى یارییه‌کانی لالیگایه‌

دوێنێ‌ ئێوارە تیروپشكی ڕكابەریەكانی وەرزی داهاتووی خولی ئیسپانیا ڕاكێشرا كە یاریەكانی لە سێزدەی ئابی داهاتوو دەستپێدەكات.
 بە پێی ئەنجامی تیروپشكەكەو لە گەڕی یەكەمی لالیگا، یانەی ڕیال مەدرید لە دەرەوەی یاریگای خۆی ڕووبەڕووی یانەی دیپۆرتیڤۆ ئالاڤێسی میوانداری دەبێتەوەو یانەی بارسێلۆنا میوانداری یانەی ڕیال سۆسیداد دەكات، لای خۆشیەوە یانەی ئەتلەتیكۆ مەدرید پاڵەوانی وەرزی ڕابردووی خولەكە دەبێتە میوانی یانەی سێلتاڤیگۆ، ئەوەی تایبەتیش بێت بە یاری كلاسیكۆی نێوان بارسێلۆناو ڕیال مەدرید یەكەم یاری كلاسیكۆی وەرزی داهاتووی لالیگا لە بیستو چواری تشرینی یەكەم و لەمیانی گەڕی دەیەم لە یاریگای كامپ نۆ سازدەكرێت.
 دووەم یاری كلاسیكۆش لە بیستی ئاداری ساڵی داهاتوو لەمیانی گەڕی بیست ونۆیەم و لە یاریگای سانتیاگۆ بێرنابیۆ بەڕێوەدەچێت.
 واش بڕیارە لە وەرزی داهاتووی خولی ئیسپانیا هاندەران بە قۆناغ بگەڕێنەوە یاریگاكان، ئەویش دوای ئەوەی وەزارەتی تەندروستی ئیسپانیا ڕێكارەكانی خۆپارێزی لە ڤایرۆسی كۆرۆنا سووك كردەوەو بڕیاری قەدەغەی ئامادەبوونی هاندەرانی لە یاریگاكان هەڵوەشاندەوە .