له باره‌گای مه‌كته‌بی سیاسی پارتی دیموكراتی كوردستان له پیرمام، فازل میرانی سكرتێری مه‌كته‌بی سیاسی پارتی پێشوازی له سه‌‌رۆك و ئه‌ندامانی یه‌كێتی مامۆستایانی كوردستان كرد.
له دانیشتنه‌كه‌دا دوای ده‌قیقه‌یه‌ك وه‌ستان بۆ گیانی پاكی شه‌هیدان و سه‌روه‌ریان بارزانی نه‌مر و كاكه ئیدریسی هه‌میشه له‌یاد، دواتر فازل میرانی وێرای به‌گه‌رمی به‌خێرهێنانیان تیشكی خسته سه‌ر ره‌وشی ئه‌مڕۆی عێراق به گشتیی و ره‌وشی كوردستان به تایبه‌تی و كاردانه‌وه هه‌نوكه‌ییه‌كان و شرۆڤه‌یانی بۆ كرد، هه‌روه‌ها پیرۆزبایی له‌سه‌رجه‌م موسوڵمانانی جیهان و كوردستان به تایبه‌تی كرد بۆ به‌دیهاتنی مانگی ره‌مه‌زانی پیرۆز.
هیواشی خواست مانگی ره‌مه‌زان ببێته مایه‌ی خێر و به‌ره‌كه‌ت بۆ گه‌لی كوردستان، هه‌روه‌ها فازل میرانی خه‌بات و ماندووبوونی توێژی مامۆستایانی له به‌رده‌وام بوونی خوێندن له هه‌موو قۆناغه‌كاندا به به‌رز له قه‌ڵه‌مدا و جه‌ختیكرده‌وه فێربوون و ره‌وشت له‌سه‌ر ده‌ستی مامۆستان به‌رێزه‌كان بوونیات ده‌نرێته‌وه و ئه‌مه راستیه‌كه ده‌بێت بگوترێت.
میرانی هه‌روه‌ها ئاماژه‌ی به‌وه‌شدا كه دوای شه‌ڕی داعش حكومه‌تی عێراق دژی هه‌رێمی كوردستان وه‌ستا و ره‌وشی كوردستان به‌ره‌و خراپی رۆیشت و رووبه‌رووی چه‌نده‌ها قه‌یران بووینه‌وه، به‌ڵام سه‌ره‌ڕای هه‌موو قه‌یرانه‌كان مامۆستایان نه‌یانهێشت ده‌رگای قوتابخانه‌كان دابخرێت و پرۆسه‌ی خۆێندن به‌رده‌وام بوو و ئه‌مه جێگه‌ی شانازیی و سه‌رفرازییه بۆ مامۆستایان و رووی راسته‌قینه‌ی نه‌ته‌وه‌یی و نیشتیمانپه‌ره‌وه‌ری ئه‌م توێژه گرنگه‌ی پیشاندا.
تا ئێمه خاوه‌ن كه‌سایه‌تی وه‌ك مامۆستایان و هه‌موو موچه‌خۆران و خانه‌نشینه‌كانی كوردستان بین هه‌ر سه‌رفراز ده‌بین.
لای خۆیه‌وه مامۆستا ئه‌حمه‌د گه‌رمیانی سه‌رۆكی یه‌كێتی مامۆستانیان كوردستان سوپاسی مه‌كته‌بی سیاسی پارتی كرد بۆ ره‌خساندنی ئه‌م دیداره و پوخته‌یه‌ك له سه‌ر ره‌وشی یه‌كێتییه‌یان و ئاسته‌نگ و گرفته‌كانی كه بۆیان دێنه پێش، پێشكه‌ش كرد و دووپاتیكرده‌وه كه مامۆستایانی كوردستان وه‌ك پێشمه‌رگه‌ی كوردستان له سه‌نگه‌ری پاراستن و پێشخستنی خوێندن به‌رده‌وام ده‌بن و هیوای خواست ئه‌م جۆره دیدارانه به‌رده‌وام بن.
کۆمێنت (0)
تا ئێستا هیچ کۆمێنتێک نەکراوە.