حه‌سه‌ن رۆحانی، سه‌ركۆماری ئێران، هۆشداری ئه‌وه‌ی دایه هاووڵاتییانی وڵاته‌كه‌ی كه له دوو پارێزگای ئێران شه‌پۆلی چواره‌می كۆرۆنا ده‌ستیپێكردوه.
رۆحانی، له میانه‌ی به‌شداری كردنی له كۆبوونه‌وه‌ی ده‌زگای نیشتمانی به‌ره‌نگاربوونه‌وه‌ی كۆرۆنا، باسی له ره‌وشی بڵاوبوونه‌وه‌ی په‌تاكه كرد.
سه‌ركۆماری ئێران، ئه‌وه‌ی ئاشكرا كرد كه له دوو پارێزگای وڵاته‌كه‌ی شه‌پۆلی چواره‌می كۆرۆنا ده‌ستیپێكردوه و ئه‌گه‌ر هاووڵاتییان پابه‌ندی رێنماییه‌كانی خۆپارێزی نه‌بن ئه‌وا په‌تاكه ده‌گوێزێته‌وه بۆ پارێزگاكانی دیكه‌ش، گوتیشی: "ره‌نگه بازاڕ كردن و گه‌شت كردنه‌كانی كاتی نه‌ورۆز تووشی كێشه‌مان بكات. جۆره نوێكه‌ی كۆرۆنای گۆڕاو كه له به‌ڕیتانیا، به‌ڕازیل و ئه‌فریقای باشوور بڵاوبووه‌ته‌وه له جۆره‌كه‌ی پێشوو مه‌ترسیدارتره".
ده‌رباره‌ی نوێژی به‌كۆمه‌ڵیش رۆحانی، ئه‌وه‌ی ئاشكرا كرد كه له ناوچه سوور و پرته‌قاڵییه‌كاندا ئه‌نجامدانی نوێژی به‌كۆمه‌ڵ و چالاكییه جه‌ماوه‌رییه‌كان قه‌ده‌غه‌یه، به‌ڵام له ناوچه زه‌رد و شینه‌كاندا به له‌به‌رچاوگرتنی رێوشوێنه‌كانی خۆپارێزی رێگه‌یان پێده‌درێت.
هه‌رچه‌نده سه‌ركۆماری ئێران ناوی ئه‌و دوو پارێزگایه‌ی ئاشكرا نه‌كرد كه شه‌پۆلی چواره‌می كۆرۆنا-یان تیادا بڵاوبووه‌ته‌وه به‌ڵام به‌گوێره‌ی ئه‌و هه‌واڵانه‌ی له راگه‌یاندنه‌كاندا بڵاو كراونه‌ته‌وه ئه‌وه دوو پارێزگایه ئیلام و ئه‌لبورز-ن.
کۆمێنت (0)
تا ئێستا هیچ کۆمێنتێک نەکراوە.