ژۆرا ئۆپەراسیونێن کۆرونایێ ل پارێزگەها دهۆکێ هژمارەکا رێنمایان دەرکرن

ئەڤرۆ رۆژا ئێک شەمبی رێکەفتی ٢٨/٣/٢٠٢١ ب سەرپەرشتیا   "د.عەلی تەتەر" پارێزگارێ دهۆکێ و ب ئامادەبوونا دەڤەردار و رێڤەبەریێن پەیوەندیدار کۆمبوونا ژۆرا ئۆپەراسیۆنێن پارێزگەها دهۆکێ هاتەکرن. دکۆمبوونێدا پشتی هەلسەنگاندنا رەوشا تووشبوویێن ڤایرۆسێ کۆرونایێ کو ل دویڤ داتایان هژمارا  تووشبوویێن کۆرونایێ بەرەف زێدەبوونێ یە، پشتی دان و ستاندن و هەلسەنگاندنا رەوشێ دۆپاتی ل جێبەجێکرنا رێنمایێن هژمارە ١٠ یێن لژنا بلندا رویبروبوونا کۆرونایێ ل هەرێما کوردستانێ هاتەکرن و پاشان دکۆنگرەکێ رۆژنامەڤانیدا پارێزگارێ دهۆکێ راگەهاند: داخوازێ ژ هەمی هاولاتیان دکەین خۆ بپارێزن و کەس و کارێن خو ب پارێزن و جڤاکی ب گشتی ب پارێزێن رێنمایێن ب سەناهی نە ب گرێدانا ماسکەکێ دێ خۆ و دەوروبەرێن خۆ پارێزیی و هیڤیدارین نە بنە ئەگەر کو رەوش خرابتر لێ بهێت و دەرگەهێن گەلەک جها بهێنەگرتن" هەروەسا داخواز ژ هەمی هێز و لایەنێن سیاسی ل پارێزگەها دهۆکێ کر کو هاریکار بن دبجهئینانا رێنمایان دا پاشی بەرسڤا پرسیارێن رۆژنامەڤانان دا. 
ژگرنگترین رێنمایێن ژۆرا ئۆپەراسیۆنا روی ب روی بوونا کۆرونایێ ل پارێزگەها دهۆکێ:
١-داخوازێ ژ مامۆستایێن ئاینی دکەین دگۆتارێن خو و نڤێژێن ب کۆم دا رێنمایێن خۆ پارێزیی جێ بەجێبکەن و زێدەتر  هوشیاریا جڤاکی بکەن.
٢- هەر دام و دەزگەهەک و رێڤەبەریەکا حکۆمی پێگریێ ب رێنمایان نەکەت دێ هێنە سزادان.
٣- هۆلێن شەهیانا دێ ڤەکری مینن ب مەرجێ بجهئینانا رێنمایان و بەرۆڤاژی دێ هێنە سزادان و هۆل دێ هێتە گرتن.
٤- کافتریا و رێستۆرانت و جهێن کێشانا نارگیلا ل دویڤ رێنمایان دێ دڤەکری بن و بو دانانا نارگیلا نابیت ل جهێن گرتی بهێتە کێشان.
٥- رێکخراوێن جڤاکێ مەدەنی و سازیێن پەیوەندیدار نابیت خرڤەبوون و چالاکی و خۆل و هەوێن گشتی دەرڤەیی رێنمایان ئەنجامبدەن و هەر چالاکیەکا پێدڤی نەبیت رێک پێ ناهێتەدان.
٦- ترۆبێلێن نەفەر هەلگر "تەکسی،پاس، کۆستەر" پێگێریێ ب رێنمایان بکەن و نابیت بێێ ماسک چ کەسان ب هەلگرن.
٧- چوونا گۆرستانێ نابیت بیتە جهێ قەرەبالغێ و کۆمڤەبوونێ و هۆلێن تازیا دێ گرتی مینن و دانانا خیڤەتان و خرڤەبوونان دناڤا کۆلانان و مالان دا قەدەغەیە.
٨- گرۆپێن گەشتیاریی ب مەرجێ جێ بەجێکرنا رێنمایێن خۆپارێزیی گەشتا ئەنجامبدەن بەرۆڤاژی رێک پێ ناهێتەدان.
٩- نەخۆشخانا و کلینیکێن تایبەت و مللی نابیت ب هیچ رەنگەکێ خرڤەبوون لێ هەبن و ئەو جهێ پێگیریێ نەکەت دێ هێتە سزادان وگرتن.
١٠- جهێن گشتی و بازرگانی و مارکێت و مۆل بێێ ماسک کەس  سەرەدانا وان نەکەت و پێدڤیێن خۆپارێزیی ل بەر دەرگەهێ هەمی جهان بهێنە دانان و بکارئینان.
١١- داخوازێ ژ هەمی دەزگەهێن راگەهاندنێ دکەین رۆلێ خۆ دهۆشیاریا جڤاکیدا باشتر بگێرن و پەیامێن هۆشیاریێ بەردەوام و بێێ  ڤەقەتیان بەلاڤبکەن.